笑！

年尾流流。 。 。 嚟個。 。 。 笑嘅！

自從 yelling 男被炒，公司忽然喺月頭決定一月尾搬; 極度機密，大概知新地埗喺邊忽 (大概得幾模糊吓！)，又忽然，上星期另一高層過料話已改地點 (吓？唔係裝修緊咩？)！

Fine，我只關心行幾遠啫！

lunch 前，老細召開大會，又宣佈最新擬訂嘅地埗！

Felt a bit strange！！其實，自從話搬去嗰頭，感覺將有嘢發生故心肝一直忐忑！

點知，真係！

真係同爭我錢嗰個舊相好，同一躉 たてもの (建物)！！

師傅話同我好夾 + 值得爭嗰個，唔係翻灼呀？！閉，曾經有人批過我有機會舊情復熾嘅！唔係呀？！？！呢期，我鍾意 フミヤさん 喎！

定係，蒼天知我真窮，安排我追返條數？

錢，自佢坐監嗰刻唔預佢還得起啦！前世我殺咗佢，嗰舊錢還條命，抵吖！

翻灼？應該唔會嘞！昭然鍾意刺激，返轉頭玩玩過嘅嘢，唔係我啦！

哈，玩邊科？拭目以待！

唓，昭然有乜唔敢講唔敢做唧？我喪嘅！更何況，從來理虧都係人哋！

所以話，做人要光明兼磊落！
(噢，講錢銀我氣壯，但感情上。 。 。 表面上係我負咗人嘅！)！

我已經夠厚道啦，即使知佢喺邊、 做盛行，我都冇搵佢，唔搵唔代表我鵪，我只係俾佢儲夠錢贖返個良心唧！又雖然俾我知佢揸緊兩層樓，我依然靜默，睇佢做撚樣想做到幾時？ (撚樣，係知情者安俾佢嘅！) 即使佢入冊，朋友話搵人 '探' 吓佢，我都拒絕，打落水狗嘅事我唔做啦，更何況曾經真心愛過呢！

正傻仔，要查、 要搵、 要見一個人有幾難唧？除非，佢落咗地獄啫，就算真係喺地獄，我都有辦法搵到佢！喪嘅昭然，自然有超乎自然嘅計啦！

哈哈哈哈哈哈哈哈………

似乎，2011 至 2015 被迫回流返嚟，都未夠 '精彩'！相信，嚟緊嘅 2016 更加不~得~可~了~呀！

唔怪得啲師傅羨慕我啦！

羨慕我條命囉，好玩囉！  \^o^/


昭然

默許。 。 。

每朝返工前，備妥嫲兩餐、 洗杯、 煲水、 切生果盒兩份、 換片、 餵藥、 倒垃圾。 求其有乜著乜，返工賺糊口費！

每晚放工後，未換衫，先執嫲食完嘢嘅局面。 如嫲冇瀨濕，我可以即刻快快趣趣沖涼，事關要開門接外賣; 否則，好似今晚咁，叫外賣哥哥擺喺門口，我忙住同嫲沖涼呢！食飯時洗一機瀨尿衫褲、 飯後一機瀨尿被！

食完，服侍兩機嘢，抹嫲床、 換床單、 被袋、 鋪暖毡、 鋪尿墊… 仲要洗碗洗煲抹枱，溫書 then 瞓覺！

冬至日，農曆牛一，過咗都唔知！今日西曆生日，遠喺日本嘅記得 (印象中，佢第一次祝福我)，仲喺 0837 message me :-

誕生日おめでとうございます❗
そして良いお年をお迎えくださいませ❗

學日文唔係為呢個人，確實地，完全為咗 藤井フミヤさん 而學 (我唔講大話㗎！)！

雖然，我唔當自己係人，唔係人又點識慶祝生日？！

又雖然，再多再重嘅磨練，我都會默默承受！

但，總有許願嘅權利啩？

但願，個殼唔好被玩至殘醜，靠佢搵食！

但願，體魄健壯，以便對策日本之旅！

但願，終歸明瞭 フミヤさん 所講所寫！

祈願，要識嘅快啲學好，要嚟 '溝' 通㗎！


昭然

鎮守の里 - 詞曲唱 フミヤさん 一手包辦，為伊勢神宮廿年一次嘅遷宮盛會 「第62回神宮式年遷宮」 而作嘅。

一年到頭又重頭！

噚晚，睇流年。

同昭然預期嘅，差唔多啦！

至重要學業。 。 。

亦預料到啦，唔得又唔係、 得又唔係，成績一般啦！正常吖，聽、 寫、 講、 睇，總會參差吖！況且，根本冇時間讀呀！

唓，我又唔係去考慶應，夠昭然喺日本生活同溝得掂 フミヤさん，兼唔好嘥時間 + 嘥錢，繼續跟得上就得啦！其實，好難，一定會留班！

全晚戲肉。 。 。

呢個師傅除咗係我密宗同門師兄 (偶然知咋)，佢仲同我一樣係 Checkers 迷！

世事，湊巧？！

唔係啦，係 フミヤさん 過於出衆啫！

フミヤさんはすごいですね。  ♡(^ε^ )♡

師傅奇怪我點會夠老識 Checkers？ 拜託，嗰陣我仲係細路女！

Oh, have a LOVELY holidays 啊！

~ ~  *  メリークリスマス  *  ~ ~


昭然


*  *  *

笑話一則

據說，肥妹今年桃花到！

據聞，條友同我好夾喎！

據講，值得同其他女爭！

呢個師傅，唔熟我脾性就係唔熟！

一、 50 歲前嘅桃花我知唔到尾，我唔會嘥時間喺無謂嘢身上，我好忙㗎！

二、 貞操二字，而家我守得好嚴，係留俾將喺 50 歲後出現嘅佢; 何況，30 歲前，我乜都玩過兼玩夠！

三、 男人對我嚟講，要嘅隨時都有！以前未駛追過，而家叫我爭？！？！除非，佢係 フミヤさん 啦！

我唔會笑呢個師傅嘅，佢只係片段式睇流年而唔係開命盤睇; 開盤睇過，相信佢噚晚一定唔會咁講！

幾乎，死！

嚟唔出，已經兩個幾月嘅事！

12 • 8 如常似嚟似唔嚟！

12 • 9 考完試，輕鬆晒！

當晚嚟到，開心瞓，直至日頭都正正常常！

踏入 12 • 10 零晨，起幾次身，三塊衛生巾都頂唔住？！咁大個都未試過？！已經過咗第二日，仲咁多？！

第二朝扎醒已經 0817，嚇死！碌落樓、 搶的士，WhatsApp 返公司已係 0834！拜託，居然全程唔塞車，0845 到公司？！奇蹟！！

定定神，發覺條打底褲底面反轉著！嗰十零分鐘魂飛魄散咁碌落街，能執齊兩副眼鏡出門已算叻！

直至今朝，血繼續大量湧出！衛生巾存貨只剩一塊，一塊頂唔住啦！唯有著嫲嘅日用尿片，不知多好，點郁都唔漏唔滲！

㗎仔貨靚即係靚，又滑又貼 (嫲，妳真幸福，係我幾億未開頭，至捨得買俾妳粗著！)！

好彩上星期已約今朝覆診，同醫師仔匯報我咁咁咁、 嫲又咁咁咁。 。 。

唉，一係血虛嚟唔出，一係就腎虛引致血崩、 流血不止唔曉停、 嚟到腰斷伸唔直？！？！

我問係咪有水 pop 或瘤，佢話唔係！我話眼好澀，佢話本身已經唔夠血用，仲要由九號晚失血到今日 (嘩，失足三整日，有多！)，梗係澀啦！

醫師仔判斷我是日，脈弱 + 面灰！

型呢？心中只有灰色 hahahaha…

身體已經虛弱仲要冇胃口，抵抗力弱，面喺上月已生疣！唔想疣再擴大或生蛇，甚至面癱或其它，所以幾唔想食都迫自己食嘢！

醫師仔吩咐，一定要食飯！盡量啦！

醫師仔仲話，唔好希望瘦，我一瘦就好麻煩！

佢有 '讚' 我㗎，話我今次唔暈低、 叫白車，都算好嘢喎！

我都讚自己。 。 。

雖則廿二號至放榜，即使遭遇再灰惹我累及餒！

我，依然溫書、 執筆練字，下一個 sem 無論喺邊度開始，總要先裝備好自己！

古有，前人吐血赴殿試 ;
今有，肥妹崩血仍挑燈！


昭然

醜怪！

有日喺公司，接到嚟自倫敦嘅電話，佢，一輪嘴 blah、 blah、 blah。 。 。

個男人一直 blah，我想插嘴都唔得！加上，十月尾拆咗牙箍後，日頭要戴透明牙箍 (講嘢會黐脷筋之餘，個嘴都郁得較慢！); 總之，唔靈活就係啦！

其實，我冇乜心機聽佢 blah！事關，一聽就知佢冇 go through all email before he picked up the phone！忽然，聽到佢講 agreement 呢隻字，即時醒晒！嘩，咁快拗 terms？！

I'll be with you in a sec 都費時講，夾住電話筒、 拎起張紙巾，即除上下牙箍！呼，鬆晒，到我 blah blah blah 還佢拖！

雖然，喺同事眼中嘅昭然係蠢嘢而排斥我！但我出口喎，梗贏啦！

(蠢？平日我掩飾得好啫，埋牙做嘢有效果咪得囉，喺班蠢貨面前扮蠢咪等佢哋死先囉！我記得師傅吩咐㗎，我條命鋒芒太露要扮蠢收斂呀嘛！)

嗯，把口贏咗就止呀！收綫，即刻跟個 email copy 晒有關人等，寸佢添呀！

贏咗，仲醜喺邊呢？

事關，喺電光石火除牙箍，而牙箍又連住兩絲口水破出之際，我係見到有人行過我個位嘅！最醜係，我嚟唔切睇佢係邊個囉！！

唉，好核突呀！！！！！！！

我靚女嚟㗎嘛 ) ) ) )   :〒0〒:


昭然

號外

呢四個月，昭然，一直忙！

再忙，都要記低今朝所發生嘅。 。 。

1145 老細 call meeting, an URGENT one！

Conference Room，Management 坐、 二打六企。 一開波，老細望住我問，少咗邊個？

我笑、 佢笑！衰衰咁，少咗 yelling 男囉！

全程，老細望住我講？！

Yelling 男喺禮拜五收工後突然被 term.，咁突然梗係大鑊嘢啦！

機密嘢，喺度唔方便講咁多！

有幾機密？

全公司，凡有密碼嘅嘢，全改！

門鎖，禮拜五即換！

老細明示，唔介意、 但唔建議員工私下同 yelling 男會面！

我同另一倒屎講 yelling 男約過我好多次 and show him those messages。 。 。

好彩我唔係姣婆仆到去應約，咪嫌疑就大囉！

Yelling 男賤到頂呱呱，佢就喺我哋樓上個行家度開工咋！

我覺得老細好慘，俾賤人 '偷' 咗幾多嘢？計唔到啦，六年喎！

Yelling 男都冇腦嘅，行頭再大都會相逢，何況，我老細喺行頭係亞洲一！大客會跟你走咩，就算跟，你都做唔到我公司做緊嘅嘢啦！

亞洲一，咁易冧咩？不過，敵人在暗講明會搶生意，我個位都要醒定啲！

都話唔好得罪我，對我唔好嘅人，下場通常慘痛！

昭然個心唔係涼，佢老幾吖？喺我心裡面有個位，咁易咩！

我只想記低老細全程望住我講嗰個樣啫，he's such as a cheeky old monkey！  \(╯-╰)/


昭然

偶遇！

中秋晚行行吓，偶然遇見到呢個招牌！

好耐好耐以前，當年我喺尖東返工; 我見放工放得早，咪搵兼職做囉，見報紙請傳酒員咪去見識吓囉！

咁啱我朋友亞哥就喺裏面做經理，一坐低，佢亞哥就不停說昭然 '坐'？！

噢，我想 '跪'，你偏要我 '坐'？！

原來，氹人 '坐'、 '瞓' 嘅說話都係嗰幾句！當日我聽到嘅，有呢啲 。 。 。

'跪'，好辛苦㗎！成晚跑嚟跑去，酒水又重！

'坐'，又有人幫妳化妝扮靚，舒服又搵得多！

最後，佢對眼由我心口掃上我塊面，評估我應該搵最多嗰個！(當時我著貼身黑色樽領衫加燈光昏暗，咁都睇到？！)

同時間，佢班女變晒身妖住出場！

噢，親眼見識過，登時心領神會！

係，我絕對會係最快搵最多嗰個！

呢個場，幾廿年仲著緊燈？堅勁！


昭然

がんばります！

4cm，約莫兩節手指頭嘅長度。

フミヤさん 高我 4cm，好矮啊！

4cm，若然彼此距離只有 4cm。 。 。

豈止四目相接？仲互換一口氣添！

WOW~~  不得了，意境極之撩人！

若，4cm 係距離; 又何懼，亦變奏成長度呢！

哈哈哈哈哈，你哋知我講乜嘅！

再若，只剩 4cm 距離; 我必定駛出渾身解數 flirt 爆 フミヤさん！

癲？偷生中，總要有目標追呀！

目標在前，唔癲唔迷，點到手？

フミヤさん，為咗你，壓力再大都會撐過嘅！

唏，がんばります！ ( self-motivated… yell yell   └(^o^)┘ )


昭然

無了盡？！？！？！？！

是日。 。 。

0813 埋位 (禮拜五已預知忙，故比平日更早返工！)，我班 '全世界' 唔止 click 手，仲杉手！個壇忙到火燒咁，期間仲要開咗個會 (老細你生吓性啦，Monday morning 咪咁玩！)？！？！

冇食晏做埋嗰個鐘，趕準時收工！

冇 OT，仲想我蝕埋收工時間？好行，唔該！

年尾加人工再加得唔令我滿意嘅話，睇我反唔反你？

只有做，我冇錯都要被 diu？！

同事間，各懷鬼胎冇話安慰吓！

返到屋企又做？！？！？！？！

大半日，只有做做做 + 受閪氣！

日日係咁循環，的確，好撚悶！

。 。 。 是日，真係，諸事不順。 。 。

捱到收工，喺地鐵入閘都要遇到廢青？！

黑到，唔敢行多步，即刻返歸哩埋！


昭然

攰到癲！！！

呼~~ 好攰！唞吓！！

唔係為咗 フミヤさん，真係唔會搵自己笨！簡直趕到癲、塞到爆，壓力，嚟自極度緊湊！！

前日，フミヤさん 鄉下隊 baseball team 獲勝，睇得出 フミヤさん 為此而欣悅！

開心，就好！好好生存，等我啊！！


昭然

Is this just a dream?

自從，六月中忽然記起 フミヤさん，今朝臨天光係第二次喺夢裡面見到佢 (昭然冇乜幾何發夢㗎！)！

第一次，フミヤさん 去買雪糕，然後我哋坐喺公園一齊食！哈！

今朝臨天光，我同 フミヤさん 瞓喺同一張床，兩個瞓得好淋！忽然，窗外好嘈有影相聲，係記者偷影！

嘩，偷影？

極速各自遮住重要部位，然後向床兩邊閃開; 熟練程度之高，明顯反映 both of us 偷慣食！ 哈！！ (哎喲，點解得事後畫面，冇咗之前嘅過程㗎？！強烈要求重播整段畫面！)

Hiya gorgeous, you look so juicy!  We'll definitely root together one day!  ♡♡

hahahahahaaaaaaaa…


昭然

震！

智利 8.3 級地震並觸發海嘯，隨時波及日本？！

噚日，日本島大範圍地震，而呢幾日震嘅次數明顯比平日少。 。 。

據我印象中嘅記錄，311 發生前就係震得少！噢，再加埋阿蘇火山蠢蠢欲動！！

每日，昭然都有留意日本災難預報，確實，擔憂 フミヤさん 嘅安危！！！

フミヤさん 要好好生存啊！我真係好想好想，喺現世同你見面㗎！！

懇請，佛菩薩保祐藤井フミヤ！


昭然 合十

笑吓過日！

080915 (二) - 笑話一則

上午公司，我對住 mon、 迷一般作緊文，yelling 男企喺我隔離等 print out，佢，忽然開聲講嘢。 。 。

'妳睇咗 message 咁耐，仲未覆我幾時去食飯嘅？'

其實，唔係因為上次 yelling 事件，昭然一向好少同同事講閒嘢 (唔講廢話閒話唔埋垃圾堆，做好本份免老細煩心，係我出嚟撈嘅宗旨)！yelling 事件後，招呼都費事打，除非係工事。

估我俾乜反應佢？

•
•
•
•
•
•
•
•
•
•
•
•

我繼續迷作文，不過，忍唔住對住 mon 咔咔咔咔咔咔大笑！

邊笑邊心諗 '你都黐撚線，yell 完當冇嘢呀？啋你都戇！' 如果唔係返緊工，我一定會咁講！

我坐喺位只笑冇答，佢企喺度望住我，唔記得佢繼續講乜！只記得好好笑，真的黐鳩線！

蘇寧男都識整電話吖，你就淨係識 yell？！食食吓飯你又 yell，我會好驚個喎！！

更何況，同有乸之佬玩嘅 quota 唔可以嘥喺你呢啲貨色度囉，我會留俾 Fumiya-san 囉！

070915 (一) - 每月例會

倒屎 e 擺我上抬問我有冇問題，想借我篤 yelling 男。 。 。

我夠肥，你擺我唔到嘅！我話冇問題，不過… 一嘢扯開篤第二個，嘻！

昭然唔係八婆更唔係小人，我根本就不屑同低智嘅人類交手，我嘅存在係做大事唔係同無謂人及事糾纏嘅！


昭然

開始！堅持啊！！

自己顧自己，原來咁舒服嘅！

今日瞓到三點起身 (明顯，攰到透支！)，半個鐘後出中環見徐醫生; 四點半，行入橫街搵訂方食我全日唯一嘅一餐。

五點起程，三個月前自己為自己鋪排好嘅 '要事'，今日，正式開始 。 。 。

既漫長且艱巨又孤獨嘅路啊！

為咗 '佢'，要堅持啊！！！！

嫲喺邊？禮拜四送咗佢返佢自己屋企，社署禮拜五家訪嘛; 如果唔訪，生果金會少一千蚊，兩嫲孫真係驚餓死㗎！寧願撲嚟撲去都唔會俾社署上我間豪宅啦，豪宅喎，都係扮可憐好啲！

飲完藥，瞓醒覺，聽朝又要打回原型做奴隸孫啦，又要返去接嫲去飲茶行街啦！

真羨慕啲人乜都唔駛顧冇家累，原來咁爽嘅！

昭然，幾時至自由？

他條扮靚至出街？？

做吓自己嘢呢？？？


昭然

光怪陸離！！

惶惶怪世代！！！

今朝做嘢做到如火如荼，想 click 左二 icon 用。

嘩，咁樣嘅？驚中伏惹病毒，即縮手！

諗起喺 BBC news 睇到改 logo 報導，安心啲！

末世時期，連個掣都要咁小心看待？！

怪不得，醫生救路人都要驚叫讚嘆囉！


昭然

痛腳s！！

今晚玩咗兩個半鐘，玩咗電腰電腳電頸 & 吊頸，吊 41 lbs，腰加碼至 83 lbs，好舒服啊！舒服價 530 大洋！

嘻…

擔心對膝頭，除咗驚走唔郁離開香港; 其實，最驚第日同 hon hon 互動時，唔能夠將昭然渾身解數發揮得淋漓盡致！

嘻嘻…

唔駛驚 hon hon，就算我攤喺度都唔會死魚咁嘅，我會交足戲嘅！

嘻嘻嘻…

癲完！

飲咗好難飲嘅藥 ，半夜三點再飲，勝嘅！

呢個醫師，會係上天派嚟救昭然嘛？

為將來行得更遠、 做上天已安排好嘅 '事'，錢，總要花嚟吊命！

撐到底啊，萬象光芒在咫尺！

癲夠嘞，瞓覺，早唞！

Come on, it's a full moon nite in this  Friday, right?  Be WILD!


昭然

痛腳！

變種紅雞蛋餐廳老細介紹昭然嚟呢度睇。 。 。

電腳 +
電腰 +
78 lbs 拉腰 +
一袱手掌長用雞蛋開嘅蟲蟲凍藥 +
(問都唔肯講，聽日至講我知有乜！)
兩日飲嘅藥

個半鐘，承惠，七百大洋？！ @~@::

門深，狗惡？！

荷包，淌血！！


昭然

無語！！！

blue Monday？！嚟個笑嘅！

話說，豪宅樓下八婆又投訴昭然 。 。 。 間豪宅！

回流返嚟四年幾，佢一直咬住我經常投訴！管業處要員私下話我知，亞八婆喺呢個屋苑頗出名，出名係，投~訴~王~！！

八婆經常投訴，我就被迫經常搵裝修佬啦 (嫲亦在場)！

大熱天上到嚟梗係坐吓飲杯嘢，又講吓廢話咁啦 (唔通要人哋即刻開工，然後趕人走咩？)，講吓講吓，佢又表達愛意 (每次借啲意又嚟)！！係呀，由裝緊修到而家，明示暗示唔係第一次㗎喇，臭屎密冚，我唔講咋！

佢大概話，我唔拍拖乜乜乜 (唔記得係乜乜乜，反正冇心機聽廢話)，第日老咗有佢照顧昭然！

哇，即醒！

你仲老過我，我照顧你咋啩！佢仲兜，佢經常郁動身體好喎！！

嗰刻，望到佢個貴人樣出晒嚟 (似㗎佬)，平時都唔覺佢似㗎佬嘅？！

我當你貴人咋，咪亂諗咁多呀！我幾老都好，我對任何嘢嘅要求，係絕對唔會降低㗎，死咗條咁嘅心啦！唔係老咗就任你上，昭然，唔係雞呀！

天呀，我唔拍拖唔結婚啫，唔係咁怪呀？！呢啲對手，心領嘞！

昭然而家鍾意 + 宏大嘅目標係 Fumiya-san，咪嚇醒我，唔該！

定下驚先！

，ONE NIGHT GIGOLO vs CALL GIRL？！哈哈哈哈哈哈哈哈。 。 。


昭然

問題喺邊度？？

老細請昭然返嚟，每日數住日子點過 (錢，真易賺！)，我習慣每半日畫一藍線…

噚晚臨收工，忽然，望到唔對路！！

整乜，31 號印喺上面㗎 ) ) ) )

害我 OT 執手尾改改改，算！

月曆大佬，至緊要千其咪鑊！

真低能，俾個月曆跣！
(笑ing，but  switched to 無奈 mode)  \(╯-╰)/


昭然

昇華 。 。 。

近半月，繼跌爆手機 + 仆街未瘉 + 心情低落 + 食慾不振！！！！黑透？未算！

8 月 12 (星期三朝)，經常約昭然食飯嗰個 BBC 倒屎唔明事件亂覆喵！我慶，即打俾佢 blah 一輪，佢仲未明？！臨收線，佢叫我入佢房，我話我唔得閒叫佢出嚟 我 cut 線 。 。 。

(佢蠢到咁，我入去都係咁啦，賺嘥我時間！)

佢隨即喺房大嗌 '昭然，妳同我入嚟，cut 我線咁冇禮貌，唔惡都唔得…'

當時，全公司小人望住我同癲佬，尤其我大佬陰陰嘴等睇戲咁啦！

昭然，慢慢轉凳、起身，好似香港小姐接受加冕咁微笑住行入去; 笑，笑緊佢咁低能 + 負 eq 嘅行為！入到去，見到佢面都紅晒、 扯氣兼口震？！？！？！ (你咁蠢，我都未咁反應啦，你，駛唔駛… 咁呀？！好彩我入去啫，咪佢可能會仆喺地死咗，我咪又整多條罪！)

白痴嘅佢，扯住氣指住個 mon blah blah blah，我用平伏版但聲線同佢一樣高嘅語氣同佢講，你同乜乜了解咗件事先啦，你咁覆係冇用㗎！佢繼續低能督 mon，真的白痴到絕地！！！！我出房，佢仲白痴到話 '睇一陣人哋點覆…'？！？！？！？！ (烏鴉飛過中)

埋位未坐低，老闆娘返到。

晏啲，客覆返，BBC 洋洋得意咁特登走出嚟話咁咁咁！！！佢絕對係冇睇清楚個喵，到嗰刻佢仲未知乜事？！？！低能如此，昭然會啋佢咩？(烏鴉，再次吖住飛過…)

第二朝晨早剛開工，Skype 見 BBC 個老死倒屎 call mtg.。

佢老死 k (坐我右手主席位)、(我大佬坐我左手，此人廢的，喺呢個環節可以 ignore )、白痴 BBC 喺我對家。

一坐低，BBC 望實我陰笑，我寸望佢一眼回佢。

口水佬 k 開始講開場白，我即截停…

'我諗叫埋倒屎 e 會好啲，technical 嘅嘢佢清楚好多，個客亦係 BBC 同佢嘅 joint account' (我嘅要求合理到冇得 ban，BBC 被點去叫 e)

(倒屎中，e 最高級 then k & BBC，我大佬 ger 位)

e 坐我對家，BBC 坐 e 右手。

k 問邊個講先，BBC '讓' 我先講。

哈，其實，我唔記得自己開始時講乜啦！只記得…

我 blah blah blah，BBC 敲枱幾聲 'hey, you listen…' 我冇理佢繼續 blah。 右手邊嘅 k stop 佢，話係我講緊叫佢 stop (似唔似選特首？)

我 blah 完，e 講嘢，e 話我講嘅係完全正確，BBC 的確唔了解。 e 仲話噚日喺房聽到佢大嗌，好冇禮貌…

e 問我仲有冇嘢要補充？你問，我就講啦！講返我忍咗 BBC 幾鑊，佢講粗口鬧我咁呀，佢梗唔認啦！我話 '粗口已成你言語上嘅一部份，你唔覺唔出奇，但係你叫我問同事嘢都變成問仆街嘢，坐出面嘅原來一班都係仆街…'

嗰刻，大家應該呆撚咗 + 心撚照，只係要爛持平咁圓場！

最後，我話 '老細嘅氣要受 - 應該，客嘅氣要受 - 應該，但你都係打工嘅，我唔需要受你氣; 唔該你以後先了解事件，唔好次次一踩出嚟就鬧我！'。 最最後，'我喺鬼域對住班三山五嶽都唔駛 foul and yell，後生仔真係要控制吓'！！

e 話昭然直率講出嚟，BBC 老死 k 即轉口風 'BBC，你 local 客少你唔知，去到昭然度，啲客野蠻啷勵唔易搞 (我個位，要服侍 global 唔止 local，唔止客仲要 deal with agents from the whole world)。'

k 仲叫 BBC 唔駛爆晒血管咁激動，哈！

* * *

原本，個 mtg. 係兩小人 BBC & k 想圍插我，結果變咗三老 (e、k、我) 圍 BBC，BBC 梗冇機會發表 '道理' 啦啦啦啦啦啦啦！！！！！！！

想玩昭然？你玩得起咩？

我十五歲已經管人，唔係好叻，係板比任何人撞得多啫，你而家至開始，慢慢撞啦！

笨實 call mtg.，俾昭然話晒你哋咁多個，真好 (房中四男子，我受盡唔少無謂閒氣啦)！

* * *

當日臨去鬼域，黃大仙伯伯話昭然過去唔係為賺錢，係去 '學' 嘢; '學' 咗好多年，我以為 '學' 做生意，原來係 '學' 心性！

感激佛菩薩賜弟子層層疊疊嚴苛試煉，我見我心性已蛻變到另一層次！果真，練就銅皮鐵骨、刀槍不入、百毒不侵之身！！

唏，但昭然始終係人，收工途中同同事 a 講，兩八婆講到咔咔大笑，a 讚我勇亦叫我小心小人，更話講出嚟都好，等佢哋咪咁唔識尊重伙計。

嗯，BBC 由 WhatsApp 追到 wechat，成日約我食飯？！照吓鏡先啦唔該，對住你，食唔落！

呢件 yell 事件，我實會同老闆娘講㗎，唔會而家講咁小家，遲啲講開咁講啦！

嗯，昭然都敢惹？想棟我？自找呀你！

* * *

呢件事，表面上我輸，喺房入面我贏！一對幾，型唔型？型㗎，我覺得！

臨瞓侍候老佛爺，我都有為自己嘅勝利而會心一笑！

噢，但嗰剎那唔型啦，勝利者同人換緊臭臭尿片喎！

，畫面即時跌 watts。 。 。


昭然

。 。 。

上星期四，又跌爆電話，但仲用得！

翌晚收工，仆街！！

心情低落，好幾日！！！

星期二朝，邊擦牙邊喊，大滴眼淚 + 鼻涕兩行！！！！

邊喊邊望鏡講 : '嫲，妳死咗，我就可以死，不如妳早啲…！'！！！！！

晚黑收工，返歸即攬實嫲，邊捨得佢早啲…！！！！！！

就嗰晚，做家務時拎住嫲食剩嘅餸汁，kick 腳，成碟倒落 sofa 度！布 sofa 索晒啲汁，洗死我！！！！！！！

星期三晚，又跌電話，雖然裂多幾條痕，依然用得，不過唔捱得幾耐！！！！！！！！

今朝，開廚櫃攞保鮮紙，跣手！嗰秒我諗，如果我唔縮腳，會唔會有鋸齒嗰邊我呢？結果，冇錯，黑到見血！！！！！！！！！

右腳兩趾見血，左膝仲損仲瘀仲痛！！！！！！！！！！

地鐵返工中，突見一師奶飛撲想霸我隔離位，即縮腳、 手護膝; 大山婆師奶衝力太大，無補於事！左膝硬食佢鐵一般嘅背囊一嘢，仲有佢條柴皮牛仔褲擦我損咗嘅膝頭！！！！！！！！！！！

痛到我聲都出唔到！妳駛唔駛咁激動呀？師奶冇事發生咁，對唔住都冇？！？！？！？！？！？！？！？！？！？！？！？！

心情低落！低到，今晚收工喺地鐵流眼淚！！！！！！！！！！！！！

天呀，袮，到底，想昭然點？！？！？！？！？！？！？！？！？！？！？！？！？！？！

想死前，心情特別低落，唯一有啲啲力氣，諗起佢。 。 。 1'33" Fumiya-san

自細喜愛藍！大個女後，更喜愛男人著… 三件頭！！

原來，好多嘢都係前世帶嚟！！！！！！！！！！！！！！！


昭然

鬼整？！？！？！？！

喺屋企，倒吊拉筋按摩中 。 。 。

點解左膝挫傷，但右髀外側又痛又瘀？其實，仲發現好多地方又瘀又痛添？！？！？！？！

唔好以為昭然有得唞呀，噚晚咬實牙關都要做掂啲功夫！洗碗洗煲洗杯洗壺、侍候老佛爺沖涼洗頭擦牙、換片、抹床、抹地、換床單、煲飲用水、灌水餵藥、dum 垃圾、洗自己、洗衫浪衫… 十二點至上得床！

今朝又重複工序，同老佛爺量血壓、餵藥、換片、換衫、梳頭、洗面、著鞋！

0930 到醫師仔度，嚇親姑娘！照燈一個鐘，一身汗！

同嫲飲茶又要諗食乜 (要經常變㗎，咪人哋會投訴㗎！)、買尿片 (個個禮拜都要買，都，幾悶㗎！)、買乾糧、行大運 (野喵嫲一出街，唔願返歸㗎！)…

醫師仔噚晚親自打電話幫我插隊，姑娘話一早插隊一定係重症！仲話醫師仔好少咁早返！多謝你啊！！

照燈期間，街坊打嚟問候 (噚晚俾佢見到昭然 gut gut 吓！)，又問要唔要幫手買嘢俾嫲食？傻瓜，我死都攬埋嫲去啦，點會俾佢一個喺企餓？都多謝妳咁有心啊！

敷好藥，我身都起唔到亦踎唔低，姑娘竟然踎低幫我著鞋！嚇死我，即刻搶返對鞋！佢話見係我至同我著，佢話我好辛苦，我有事老嫲就慘喎 (唓，其實都係擔心嫲而唔係我！)！但，都多謝妳！！

唏，返歸前，特登去仆街地方影張相; 記住呀，黃色嗰塊膠嘢好撚跣腳㗎，要小心嗰塊仆街嘢呀！

後話 :

豪宅連窗簾都冇係咪好簡陋呢？

其實，裝修完連窗都未抹！窗簾唔係冇，係未抹窗唔上窗簾住啫！

唔係窗簾咁娘啦，我度咗韓國靚窗紗前深藍後淺金，一手係我設計叫亞姐唔好車褶我會點開，佢話好靚我好捨得！因為，全屋兩層靚紗好貴 (豪宅冇乜嘢係大陸嘢，全部來路貨)！貴，但係型呀，我鍾意就得啦！

天呀，唔好咁多嘢煩昭然啦，我真係好想拆箱執屋上窗紗呀！


昭然

真的仆街了 。 。 。

有啲 down，去睇吓 Fujii-san！

點知，第二首彈出嚟係 'life is beautiful'？！個天唔知係鼓勵昭然定係潤我？！

今日，著對好日唔會著嘅鞋; 放工，行條好日唔會行嘅路返歸 。 。 。

咁咪，仆~街~囉~！

成街人睇昭然仆街？！

好好睇咁？！

冇人幫手？！

住喺呢個半島上嘅人，真係變晒！變到，我完全唔識呢度啲人！到底，呢個半島仲係咪昭然喺度 born and bred 嗰個呢？！

左膝全著地，食晒！

即時皮破、 流血！！

而家左腳梗晒！！！

膝頭發滾兼夾瘀腫！！！！

坐骨神經有啲扯！！！！！

已經好耐好耐喊唔出嘅昭然，因為是次倒霉，都流咗少少眼淚！喊唔出，只係流兩滴眼淚咁唧！

事關，真係，好撚柒痛呀 ) ) )

好彩醫師仔俾昭然聽朝晨早打尖，又跌錢啦！

梁師傅早就話咗我今年會仆街，叫我著對好啲嘅鞋小心行; 冇得小心啦，就嗰半秒突然閃出！

唉，唔撚想講嘢…


昭然

Hiya, my gorgeous!

I really love him alot!  ♡^3^♡

變、變變、變變變！！！！！！

餐廳老闆初為人父，請昭然食隻變種紅雞蛋！

我接到時即諗，咪俾我睇死，隻蛋冇染紅呀吓！

登凳，第二朝打開 。 。 。

哈哈哈哈哈哈哈哈… 昭然實在太聰明啦！

即晚去笑佢，佢話個陪月話而家唔興染紅雞蛋喎？！？！？！

唔… 即係咁，唔派雞蛋一樣得; 派嘅就要做足，係我做事宗旨。

唔… 佢個陪月係乜人，我唔評論啦，佢老婆喺蝗国嚟，自己諗啦！

各層面都偷工減料，所以，香港變腥揀囉！


昭然

慳啲、要慳啲！

唔掂呀、 唔掂呀！！

我諗我要收埋張信用咭唔拎出街！！

個個月簽成五、六千蚊，昭然又鍾意月月找晒數唔欠吸血鬼，打工等如得個桔？！

買咁多新衫，但著嚟著去嗰幾件？！

最重要係，都冇人約我去街嘅？！ 囧


昭然

秒秒忙！

今朝扎醒 0838，劈頭第一句 '嘩，遲到！'！

唏唏，唔駛返工啊，傻婆！ =.=::

咁早較定鬧鐘做乜呢？有人還錢過昭然，要去攞囉！

晨早到郵局未開門！等！

揸大鎖匙嗰個未返！等！
(哈，好似好唔掂咁，晨早仆去等攞錢！)

等呀、 等…

害我遲咗去中環見醫生！

跟手去銀號理財，又等！

仆返豪宅接老佛爺去飲茶，送車尾，等！

邊等車邊打電話訂位，臨時臨急都 book 到 last 一張望海位，真好彩！

兩嫲孫望住海都冇胃口，作死唔定！

埋單四百六食唔晒打包？唔作死呀！

今日，巴士司機讚昭然舉牌舉得好清晰 (輪椅搭車牌)。

我同佢講，曾經有司機企出司機位嚟鬧咗我好耐，話我舉得衰！今日呢個司機話有啲同行係咁衰，唔想做！

嗯，喺腥揀推住架輪椅出街，不知受咗幾多閒氣見盡幾多白眼 & 俾低質素嘅人sssss 鬧幾多！要呻，呻唔完！

喺鬼域，好歹我都叫做有車階級吖，返到嚟為搭車而俾人鬧？折墮透呀！

為嫲，昭然仲忍到！

萬幸，嫲聾咗乜都聽唔到，喺佢眼中而家嘅腥揀，極美好㗎！

為保住嫲呢點點天真，我會盡量配合扮美好，俾嫲含笑歸天嘅！


昭然

tired to collapse…

Lost my appetite again!

Oh well, have some treats then… Fujii Fumiya!

裁冗員

昭然公司開始炒人，第一個先炒我至憎，問我攞咖啡嗰個。

佢由今日起調嚟坐喺我隔離，我嗰度好似收集站咁，佢哋唔鍾意唔要嘅就擺喺我度！鬼叫我咁爭氣咩，一人做三人嘢，department head 冇得做㗎啦，其餘三個位咪變垃圾桶囉！

呢個八婆遲昭然一日入職，佢呀，又懶又慢又自私更加唔好講責任心，一早要炒 (如果我話事，根本唔會請佢)！做 data entry 搵嗰九千幾都俾人炒，點生存吖你話！

不過，呢啲人先唔會死，全世界嘅政府部門等緊佢，佢，只適合做政府工！


昭然

誘因

嗱，六月中戚起條筋諗起 Fumiya-san，唔係無乸乸嘅！

Fumiya-san，只係，上天安排嘅誘因？
(哈，我當然希望佢係主角啦！)

十幾年前，泰國華僑同學仔帶昭然去泰國見 auntie 已經講咗㗎喇！

雖然亞差都有靚仔，但貴人幫到我喎，咁梗係揀個幫到我又有能力錫我㗎喇，仲捱唔夠咩！

我八字欠火，而日之丸就大大個太陽喺度曬，仲唔夠火、仲唔係移去日本住？！(之前話日本呢個國家孽障重，昭然嘅前生何嘗唔係殺人如麻？！)

係呢，點嘅樣至係日本人呢？矇豬眼、 肥肥矮矮、 蠢蠢呆呆嗰啲呀？

吓，我鍾意 Fumiya-san 呢亭喎！

Auntie 仲話真正嘅昭然，好有智慧、有頭腦、有思想同埋好叻嘅人，但唔合群要我改！唔，埋垃圾堆講費話，真係，做唔到！

今日行過亞婆菜檔，佢話見我成日陪住嫲會好悶，不如佢介紹個男人同我傾吓計！(嘩，妳又嚟？乜妳咁隨便㗎？！)

我梗推啦，咪陀手 lung 腳要我養多個添呀！我大把嘢想做，而家俾嫲綁死喺腥揀咋！


昭然

Happy Birthday \^o^/

Turned 53 today…

Wish you stay charm and keep healthy forever!

Fumiya-san, enjoy every single second in your life! xxx

偽裝！

今朝喺公司搏殺之際，社署打嚟問昭然做乜唔回信？

社署？？？？？？？回信？？？？？？？

哦，原來嫲生果金要覆核呀，講嘢冇前冇中間？！唔係撈嘅！

叫佢再寄嚟豪宅，跟手叫我填完表，同嫲一齊去見佢！

(吓，又請假？！？！？！唔好喇啩！！！)

聽到請假，原本個腦冇乜空間聽佢講乜嘅我，當堂醒晒先擺低工事; 問佢辦公時間、 地址喺邊、 貴姓、 電話幾號？？？？

佢夠膽死唔答我辦公時間喎？！

仲兇昭然唔核就攞千零蚊算，即刻同我喺電話填表喎？！

妳咁惡，我真係好驚個喎！

攞少一千蚊，兩嫲孫會餓死個喎！

唔大聲返佢唔識死，我一輪嘴車埋去！

最後，咪俾我講到叫佢上嚟家訪！臨收線，佢唔該返我轉頭添！

昭然雖窮，但有台型！輸人唔輸陣，好緊要！

嗯，請假？！帶嫲去見妳？！

為嗰二千零蚊生果金頻撲？！

黐撚線！

夠皮喇，咪咁密集得唔得？？？？

唔係呢樣就嗰樣，冇停嘅？！？！

呀，ct scan 約咗 10 月 29 號，see 唔出聲咪等到 16 年 9 月 26 囉！

既殘酷又猙獰嘅鬼魅世界，活將可愛小肥豬磨練成箭豬一隻！

照照鏡，偽裝後嘅自己，何其醜！

*  *  *

剛收到鬼域朋友 WhatsApp 傳嚟獅子銀號嘅信，將會凍結我兩年冇郁過嘅戶口！

一係繼續 keep、一係 cancel，總之要打俾佢哋啦！

夠喇！昭然，真係，好~攰~呀 ) ) ) ) ) ) ) ) )


昭然

風中趕~~~

半日假，喺 QE 被玩咗三個鐘！毫無指示又冇人問，害昭然排枉隊！ (唔只我㗎！)

醫生妹妹又係嗰兩堆廢話，陰影、cancer，又話嫲咁嘅年紀啦！

我講明冇食抗生素，佢話明白我嘅決定，佢照約 ct scan，我話照約，到時我可以取消！

泊嫲喺三樓，我落去俾錢攞藥，嘩，排百幾二百籌？！

排排吓、電話響，又要跑上樓攞約期紙！

你話 make sense 嘛？見醫生 12 月 31 號，但 ct scan 就約咗 16 年 9 月 26 號？！？！

我梗表態啦 (昭然，唔係傻嗰囉！)，結果，佢收返 ct scan 期紙再約喎，睇吓到時又點！(你話係咪廢？有腦都會諗吓啩！)。 乜都冇喺手，31 號嚟到同你 say Happy New Year 呀？！？！

好，又折返等攞藥; 嘩，群情洶湧！

睇清形勢點玩法，原來輪椅可優先，又即跑上樓推嫲落去等打尖。

攞完一大堆藥已經 1650，剛掛八號波！

問嫲，駛唔駛著雨褸？

唔駛，好，捉實、坐穩。 。 。

兩嫲孫喺 QE 條斜路碌住落，目標趕喺打工仔放工前同橫風橫雨前，跳上巴士！

好彩打尖攞藥唧，1720 返到豪宅附近。

請咗假至打風，表面蝕晒！

但我咁諗，我唔駛同班奴隸逼車，同埋唔駛搭我至憎嘅地鐵喎，賺晒至啱！

菩薩保佑，對昭然嚟講，今日叫順㗎啦！


昭然

Life is…

為執禮拜五半日手尾，今朝 0752 至 1305 冇停過 (有嘅，兩分鐘飲水同去咗次廁所啩！)！仲要開會，1845 至走得！

會間，有硬嘢食！我一個人食，實食得晒㗎，不過會死啫！

唔係想買多層樓、唔係想 take 個 course，老早都唔想喺度做！

噚日，裝修佬上嚟搞咗大半日！

仲有，九號又半日，湊老佛爺見廢柴西醫！

m 到，冇得休息仲要 chur 到咁行？！

攰到食唔落，夾硬食咗一碗飯！

聽吓歌先 。 。 。

Life is… beautiful?!  Oh well, I doubt it!

Never mind, Fumiya-san, your smile just like the sunrise!!  Thank you so much!!!

5'14" 藤原紀香好靚女啊！


昭然

老佛爺又出巡！

今日又半日假，湊老佛爺去醫院抽血 + xray！

xray 哥哥讚九十幾嘅嫲對答得好叻、頭腦清晰、手腳配合…

我話，駁嘴、講個人見解同埋學是非，仲叻！

再推嫲去見醫師仔，醫師仔配合我叫嫲多飲水…

嫲又學是非，話我鬧佢而佢有飲…

醫師仔咔咔聲笑住話 : '咁委屈呀？！'

出親去食嘢，邊食邊四圍八卦，唔叻唔精靈？？

日日熱死，唔飲冰嘢嘅昭然都破戒飲杯凍檸七至返到上樓！

喺太陽下行咗半日冇坐過，對坐慣 office 嘅昭然真唔簡單！

星期一返工，又做死啦啦啦啦！嫲，真好帶遏！


昭然

靠個殼？！

包裝，真係好重要！

擺上面，昭然用呢三大牌子，我搽乜、 嫲搽乜。

護膚時，嫲通常會擰嚟擰去唔想搽; 原因係，佢話佢幾十歲就嚟死，唔駛扮咁靚！ Q_Q ::

但係呢，隻手呢 。 。 。

就喺度揀緊心水，然後隊俾我叫我幫佢搽！

最終，嫲揀咗 C 牌，嫲覺得佢個罌好靚好名貴喎！

傻嫲，另外兩罌至係老女人必需，好嘢嚟呀！


昭然

藤井 F.

我諗我，可能嗰頭近 。 。 。

十幾日前，忽然諗起兒時偶像 - Checkers！

Fumiya 係咪好靚仔呢？昭然覺得，絕對係！(哈，我有個男朋友好似佢㗎，嗰時出街好多人望我哋㗎！)

亮點，Fumiya 前面堂 dum 落嚟嘅陰; 話說，當時昭然個髮型師 - 發叔 (唔係抽水，真係發叔呀！) 幫我剪過。 只可惜，型唔夠兩日俾我老豆勒令我，一係佢郁手剪一係昭然自己搞掂，總之剪咗至返學！！

發叔仲問真係剪？剪個囉喎！仲激人？激死！

發叔，您好嘛？仲在生嘛？珍重啊！

video 1'37"，Fumiya 記錯 step 嘅反應超正！證明唱現場，21、2 歲嘅佢堅掂，正爆！

佩服㗎仔嘅拍攝技巧，廿幾年前嘅嘢到而家都唔覺娘！韓國嘢唔掂啦，從來娘爆！

呢十幾日，睇返好多 Fumiya 嘅片，除咗佢哋好多歌我依然識唱，其它，斷晒片！

原來，昭然嘅前半生斷咗咁耐片？！

Fumiya 下個月 53 歲，其實仲好後生！點解你咁唔襟老，成個亞伯咁？原來，髮型、 皮膚同身型對視覺咁重要嘅！又煙、又女、又 be-lu，你好殘啊！

李居明，你講我嘅嘢中晒，希望你話昭然係靚女仲越老越靚都中啦！我唔想 50 歲就咁殘，好驚呀！

我唔排除，當嫲去咗 travel，我會賣晒啲嘢去日本住，好好感受吓 Fumiya、感受吓呢個孽障咁重嘅地方！

Fumiya-san，你唔好老得咁快呀，到時我唔認得你㗎！我會以最佳狀態去日本，希望你唔好令昭然失望啦！

Fumiya 未見到，星期五俾三個日本人煩足半日！其中有條友問咗條問題，深到呢，我要畫幅圖計掂數了解咗至敢寫喵！為咗日本國，happy Friday 唔停 sent mails to UK、Mongolia、Pakistan、Laos、Myanmar and Cambodia！！

攰，確實攰！

昭然

節日 = 閒日

噚日朝上網買完戲飛，順便打去尖嘴福記訂位睇戲後飲茶 (係，昭然喺福記嘅勢力，只限灣仔嗰間！); 點知，人哋話父親節… 滿晒 (哈，我連端午節都唔知呀！)！

係係，昭然喺某部份事情上，的確鬼鬼哋鬼婆一名，真係冇乜華人嘅節日概念！

噚晚被迫食 pizza，同嫲講快啲食，我哋慶祝父親節… 嫲話昭然冇父親，點慶祝！！！

今朝晨早起身侍候老佛爺出門，嫲孫倆認為套戲好好睇。

問嫲驚唔驚？

佢話做戲之嘛，假嘅！不過，嫲話恐龍跑時張櫈會郁，好刺激！

天氣太翳焗唔周圍搵食，直接坐車返我地頭食飯。

兩嫲孫，食晒三餸、兩飯、一甜品，飽飽！

食飽，嫲話返屋企可以瞓 (妳就嘆啦，我仲要服侍妳沐浴更衣著尿片，仲要洗衫浪衫抹地下呀！)，最重要仲要去買尿片先返得歸呀！

片未買完，又落雨！

雨未落完，嫲急唔！

趕死，即推嫲返歸！

*  *  *

係呀，昭然冇父親，今日唔駛作狀扮孝順！

仲有十二個鐘，我又要經歷返廿幾年前某日嘅日程！

聽日，家嚴死忌！

我會懷想吓，佢對嫲孫倆所做所講嘅一切。 。 。 羞家，全都係衰嘢！

佢對我兩嫲孫確實太衰太賤，任憑我挖盡心思都諗唔到佢有乜好嘢對我兩個做過？！

昭然喺鬼域時，佢經常嚟睇我，而我，每次都趕佢走，仲叫土地唔好俾佢入屋，我唔想見佢！

佢，傷害得我兩嫲孫太深！

對土地都係咁講，除非佢跪喺嫲面前認錯，否則，我呢世都唔會原諒佢！

佢兩仔爺衰，我唔原諒佢哋係一件事，但有乜超度嘢、建廟修廟，我都會預佢兩個份。

嫲話，佢兩個對我咁衰，做乜仲要駛錢落佢哋度？

*  *  *

噢，天雷轟隆！昭然，夠磊落，唔驚！

哈哈哈哈哈哈… 癲 dut dut 咁就半世！

何苦執著？一執則苦！

只係，曾經痛達深處！

始終。 。 。 。 痛！！


昭然

齊逼迫！

舊年十一月，為嫲頻撲 QE A&E、 中醫同胸肺科！

農曆年初二至新十四，嫲入院！

出院後，隨即撲健康院、 中醫！

521 CT Scan！

522 晨早，QE 已 book 好急期要嫲再照！

528 Xray！

603 聽報告、 撲中醫！

613 健康院！

702 再照再抽血！

709 又聽報告！

603 嗰日，個 xray 醫生初時話開兩星期抗生素俾嫲，去攞藥，藥劑師碌大眼問我乜事要食一個月抗生素？藥頭親自打去問醫生！

我返落去問姑娘，姑娘話醫生話，嫲似似哋 cancer，想一次過打散啲菌 。 。 。

醫生，我書讀得比你少啫，但係，我有一定思考能力㗎！

你哋西醫搞咗我兩嫲孫半年有多都未知我嫲乜事，到底慚唔慚愧、 識唔識醜？？？

我分別同 QE、 九醫主診醫生通過電話，佢哋都係廢話一堆啦！我問佢哋點解咁得意，未知乜病，就不停開咁多藥俾個老人家食？！佢兩個除咗理論一大堆，都冇乜實質嘢答得出，將嗰堆廢話重複又重複！

QE 仲話，如果係 cancer 唔會嘥資源醫嫲，因為嫲，咁嘅年紀 ？！？！？！

我明我知，資源留俾醫虫㗎嘛！但係，講嘢係咪要諗吓點講唔好咁難聽呢？我笑住答佢 : '佢乜嘢年紀呢？如果佢有一百四十歲命，佢而家仲好後生咋喎！'！醫生，又梗係冇第二句，又扯返去嗰堆廢話啦！！！

書讀得多有乜用？重複又重複講嚟講去嗰幾句，冇內涵冇料到？！

如果係細菌感染，出院到而家應該會更惡化 (因為嫲喺屋企同醫院，我叫嫲唔好食一日十粒嘅抗生素，兩嫲孫裡應外合 throw 晒佢！)！

又如果係 cancer，抗生素又點樣打得散啲菌呀？食一個月抗生素，似即刻打死個老人家多啲囉！

醫師仔話唔似 cancer，就算係，喺嗰個位嘅 cancer 惡化要好幾年，加上嫲身子好，捱得住兼有排捱！

上星期六問簽，事就係有事仲手尾長添，抗生素食咗作用不大，解簽哥哥讚我唔俾嫲食毒藥係啱嘅！

再問梁師傅，菩薩都話唔係 cancer 唔好食毒藥！師傅都讚我嘅選擇，佢話如果係佢，覆都唔去覆！

*  *  *

五月中起，我私下幫嫲減血壓藥 (原本兩粒，我要求減半粒，即，日食粒半)，減埋半粒只食一粒。

個幾月朝朝幫嫲量血壓，結果係理想嘅！

95歲半，有七日高出 140 - 159; 其餘維持 120 - 135，仲想點？！

上星期六朝覆診同 hea 做醫生姐仔講，佢都話 okay 就食一粒啦！我再問，試食半粒得唔得 😁

*  *  *

俾嫲玩足大半年，經常請下半日假嚟頻撲 (我啲假冇咗一半喇！)！撲完，第二朝又要比平時更早返工做嘢！

日常，又要顧好嫲兩餐均衡飲食，又要經常換床單、同嫲沖涼、按摩、出街玩呀、食呀、曬太陽呀。 。 。 零零碎碎數唔晒！

仲未計俾西醫嚇到喊、玩到散呢！咁落嚟，攰，不足以形容我嘅身心！

*  *  *

工作上嘅小人多到不得了，師傅話我未成氣候所以佢哋蝦我！😂

其實，呢個師傅真係唔係幾靈，佢冇馮師傅咁堅！

蝦？我冇心情、 意欲同你哋玩低能嘢啫，喺公司扮傻扮懵我強項啦！出嚟搵食，做掂自己本份為根本，老細請你哋小字派返嚟埋堆講是非、 玩分化排斥㗎咩？小字派從來都阻住晒，等天收啦！

垃圾堆，有乜好埋唧？！我由細到大都唔埋垃圾堆嘅，要埋，都埋啲叻人堆學吓嘢啦！

*  *  *

除咗因嫲而攰，最慘係，豪宅雪櫃喺過年前又壞咗？！？！？！

我堅持咗半年唔買已經兩三年嘅舊款，所以到而家都冇雪櫃用！

嫲輪椅甩轆，我又忙甩轆安排檢查維修！

部 notebook 唔知乜事，又要搵人醫吓！

手機同一個月，跌爛 mon！上星期，又 lock 機！

冷氣機盤可能吹甩咗，又滴水！

電視天線接駁有問題，我冇電視聽、嫲冇公仔睇好幾個禮拜！

有日返工，鞋爛咗，整！袋拉鏈壞咗，又整！！

咁撲法，你話呢，攰，唔攰呢？


昭然

黑！

520，十幾年前第一日正式下海出嚟撈！

十幾年後嘅今日，黑爆！

白痴同事喺昭然面前講白痴嘢，兩次！廢事聽、 行開！！西人講西話，唔曉聽！！！

收工，紅雨！

鞋、 褲全濕，行過串燒舖，個仆街就咁倒啡色水出行人路？！？！？！

左腳中晒！左鞋入晒！！WTF！！！

買晒外賣，老佛爺又話唔食？！唔食早講，我唔駛雨下頻撲吖！！

聽日，做埋農曆年後出院嗰半場戲 。 。 。

帶老佛爺去醫院照 ct scan，老廢西醫懷疑嫲 cancer 喎！(笑死兩嫲孫，中醫一早知乜事，醫好咗啦！cancer？！廢西醫！！)

假已請，咁嘅天，睇怕聽日要大費周章，改期！

呀 ) ) ) ) ) ) ) ) 夠 ) ) ) ) ) ) ) ) 啦 ) ) ) ) ) ) ) )


昭然

一點，甜！

噚晚，兩嫲孫作反，榴槤當飯！

噚日臨收工，倒屎 forward 咗個喵去 management team 嘅 account，copy 埋昭然。 唔知又衰乜又公審我？驚住睇！

係佢個客將喺下星期離職，同倒屎交帶吓又客套吓; 最尾，客咁寫仲要 bold and highlighted with yellow 。 。 。

…… please also pass my regards to Ms. CHIU Yin, and thank her for her professionalism ……

睇到呢句當堂眼濕濕，即時諗返當初點同呢個番書仔交手！

第一次，喵完答佢，佢即刻打嚟質問！我要同佢疊住搶嘴，最後，昭然大聲一 no 叫佢聽我講 blah blah blah，收線再喵再解釋; 最後，明晒！

往後，同佢交過幾次手，每次我都快狠準搞掂佢，give me 5！

對佢印象深，除咗佢煩！最佩服佢睇嘢睇得好快好 detail，好多細微嘢佢都捉到！唔似其他客唔識英文咁，寫得咁清楚都問啲白痴嘢，真係唔想答嗰啲文盲白痴 (噢，昭老細仲寸，佢叫我哋叫個客去學過 abc 先再學睇 report 喎！)！

噚日，睇吓番書仔乜銜頭，原來係某界別大行嘅高級分析員！噢，怪唔得怪唔得！！

喺呢間公司拼咗 13 個半月，俾無理客小就多，讚嘅都係首次，點會唔感動呢？！

'professionalism'！哈，昭然鍾意呢個字！

係呀，我去到邊都當自己生意咁做㗎，好搏㗎！

唔請昭然嘅公司，抵你哋仲未請到人！

喺你哋仲登緊廣告請人，13 個月嚟，少少哋我都叫做加咗三次人工同升咗職三個月嘞！你哋慢慢等啲又後生又高學歷嘅人玩夠，肯屈就定定哋有交帶打你哋工啦！我呢，就繼續幫我老細搏命嘞！

唏，我老細要求極高 chur 得我哋好盡㗎，食我老細啖飯、 喺佢手攞錢駛，唔易㗎！咪點做行頭亞大呀，哼！

哈哈哈 。 。 。 哈哈 。 。 。 哈哈哈 。 。 。


昭然

寂寞！

剛同前公司舊同事食飯。

唔同部門，只係大家級數同位置敏感，同佢一齊被帶去攞良民證 + 查身家 + 簽約，只有我同佢加個人事部亞姐秘密地完成; 我喺前公司被玩個零月走人，而佢做到而家。

佢出身正字部必然揸鬼照，但從未喺鬼域生活過; 佢話佢好多舊同事住唔慣但又唔返得嚟，好慘！佢話我犀利，可以喺鬼域生活咁耐又撈得掂！yeah！

未做前公司前，佢喺埠仔某場混，界別同我而家 job nature 差唔幾，某場係我客之一，所以同佢更啱嘴型！yeah yeah ！！

講嘅 target、術語大家都識，另一層次嘅社會大家都知係點，啱嘴型！yeah yeah yeah！！！(但都各自有所保留，保護 target 嘛！大家估估吓傾咗兩單嘢，收到啲啲料，有用！)

而家份工其實好好玩，接觸平時根本唔會接觸嘅人、事！越見得多越覺世界黑得不能再黑，黑得有啲模糊、有啲暈眩！

呢份工令昭然更寂寞，知得多但唔可以講！知得多，更想將自己隱形於醜陋嘅空間，最好能跳出宇宙脫離地星！

人類，極，醜惡！


昭然

嫲

噚日公司年夜飯，腫到件褸拉唔埋拉鏈！成個人都腫，真樣衰！

禮拜五又鑊咗！又係同一個癲閪客！！

個倒屎即時報告俾老細知，我聽到老細大大聲講佢唔覺係投訴，話我做到本份唔係咁做點做？仲話全行都知要點點點係行規，叫倒屎教育吓隻癲閪！但，老細為咗安撫倒屎，就話如果佢要搞大件事就落簿開會傾… 最後，老細仲整多句 : "不過，我真係睇唔到係投訴！"！

倒屎，實唔放過我！吃力唔討好嘅位我亦唔想坐，睇埋月尾 review 就知去向！咁嘅人工咁嘅 workload (我一個，做緊三個人嘢！)，嘥咗我囉！師傅話，呢份工唔會兜我，係我做得條氣唔順啫！咁嘅人工，要我受埋啲無謂氣？行撚開啦！ (老細兩公婆上次已經明幫我，知癲閪無理取鬧吖嘛！)

喺鬼域賺錢就忍啫，返嚟，我係賺開心囉！

但，師傅更話，我同份工好夾仲互旺，所以我咁鍾意做到而家; 最重要，佢係鬼佬公司，我條命係要湊鬼佬㗎！(我知，所以我喺香港每份工都係鬼佬大公司囉，除咗剛回流返嚟第一份雞嘢！)

---

今朝，八至十一做推拿，推完即刻侍候老佛爺更衣飲茶、 曬太陽 。 。 。

搭 lift 落樓，嫲咳，咳咗兩大口血痰！

搭返 lift 上樓，泊嫲喺 lift 口，太陽底下檢查牙仔，唔係牙有事，我即刻打電話俾醫師仔講講講，佢話咁大年紀去照吓穩陣啲，我話去九龍法國，佢話禮拜好貴！噢，窮鬼冇諗過錢添！

嫲住九龍嘟，醫師仔話去嘟嘟夠近，我話嘟嘟咁渣，坐住入伸直出嘅，咪搞！

得嘞，我有決定！

立齊證件再立埋暖水壺，衝出 lift 口推嫲去截的士！又係要車冇車啦！等咗十幾分鐘只有一架經過！

等車期間，嫲係咁叫我行去佢身邊，話佢冇事唔駛睇醫生，我叫佢唔好講嘢 (佢聲沙仲未好，仲係破聲喉)！

又專心截車，我開始流住眼淚唸咒，求菩薩俾架車我; 雖然我知嫲冇事，亦知佢做乜會咳出血，但都戥佢辛苦嘛！

眼淚未乾，就見第二架的士，仲要冇客嘅！

上車，我問去瑪麗係咪好遠？原來喺 pokfulam，噢，我喺嗰度騎過馬上山，的確好遠！咁就去 QE，只驚流感期間好多人有排等啫！

摸吓嫲有冇發燒凍唔凍，我又開始喊嘞！司機叫我唔好喊，佢話同我行邊條路會快啲！我話冇車好彩遇到佢，佢話成街客，佢食咗晏做完第一支旗，諗住去邊去邊，但唔知點解隻手扭呔嚟咗我嗰邊！

結果，路路暢通，五分鐘到咗 QE A&E！

掛號，擺低一舊去分流見姑娘，例牌問嗰兩句啦！問完，我又大大滴眼淚，姑娘隊兩口罩過我叫我唔好喊，好快見到醫生 (嘻，我嘅苦肉計之一)！

廿二分到，五十分就見 A&E 副顧問醫生，第一次遇到咁有耐性又細心嘅政府急症室醫生，顧問即係顧問！

照完肺，一點鬆啲出去等，嫲又咳出血！

點九，嗌我呢個陪診人去覆診房，攞藥紙攞 ref ltr 走得！

攞咗藥，WhatsApp 信同痰俾醫師仔睇。

結果，同我預期嘅一樣，唔飲水，肺乾，支氣管咳出血囉！

醫師仔叫我煲乜水佢飲，我話有，佢話我 good！我話唔駛食西藥啦咁，嚟見你就得啦 (凡藥三分毒，尤其西藥，尤其抗生素！！！我唔擺抗生素入口㗎，喺醫院住都唔食㗎！)！

結果，唔駛食毒藥，佢叫過年前去見佢，咁講即係放年假啦！咁就請假都去見你兩次至過年啦！

嫲知道佢可以同我一齊走好開心，喺門口洗手洗口餵嫲飲啖水，問人點落加士居道，落到去我識搭車返我豪宅。

上到車，嫲問十二點未、 而家去邊？三點喇，老佛爺！而家返豪宅附近飲茶！我扮繆佢，嫲，耷低頭，笑？！妳再係咁，係我嘔血囉！！

相熟茶樓，去到就有位，邊洗杯邊叫碟鮮班腩飯叫碟柚子骨叫碟菜，嫲扮嘢，喺我面前嗗嗗聲飲咗三杯水！又爬咗兩大碗飯，食咗四大塊班腩！

我返上豪宅沖涼，嫲喺大堂等唔上樓。

沖涼前，打俾裝修佬叫佢幫我去胸肺科排期。

沖完涼六點，頭濕濕都上床攤吓！噢，我張皮幾嘢 'Silly' 床褥好舒服啊 (嫲都有一張 'Silly')！五分鐘，豪宅電話響，我知邊個，係管理員嘛！我以為嫲又嘔血，原來係管理員驚嫲凍！好啦，我又上路啦，再見，豪宅！

---

嫲冇事，寫咁長篇，係勸大家多飲暖水、 湯水啫！我經常苦口婆心咁講，我知冇人聽但都要講！

啲人成日讚我皮膚靚，其實我休息唔夠壓力大又冇時間保養，噚日冇揸粉底㗎！

天生就梗啦，但係後天，我一日飲幾多暖水，平時飲幾多湯水，食幾多蔬菜生果，出去食嘢，我唔怕俾人小，我總會加句走味精走雞粉，多菜少肉、 唔食微波爐嘢。

注意飲食唔係為咗靚，係為身體。

我更知，有好多人同嫲一樣唔飲水！唔飲，得，有病難醫之嘛！

---

呀，等緊見醫生時，嫲問呢間乜嘢醫院？我潤佢 : "做乜呀？想知道自己死喺邊間醫院呀？"，嫲答 : "係死就好，我都陀累妳太耐！"

---

多謝菩薩，流感期間，冇諗過急症室咁靜！

多謝菩薩，賜我醫師仔、 的士司機、 顧問醫生、 護士們、 藥劑師弟弟、 教我出加士居道嗰三個員工、 知客、 裝修佬、 管理員、 九巴哥哥、 巴士乘客妹妹 (佢俾紙巾我啊！)！

以上人士，今日對我和顏悅色，感激！！

祝，以上人士，幸福愉快、 身體安康！！！


昭然

想 。 。 。

前星期日買餸，粗重嘢，左手指公甩骹！

哎呀，條條 fling 痛足一星期！fling 住，仲要煮飯、 參扶老佛爺啊！！

菩薩庇佑，俾我一嘢打去我個上門推拿醫師就約到期; 星期六上門執咗我一劑，俾咗五千大洋 (唔知五千玩幾耐呢？)！

識咗佢十鳩幾年，睇佢眉眼就知我好嚴重！

除衫未趴，佢話我條腰骨搞過乜？周身冇忽好？骹都甩埋？都唔知我搞乜？

推正個骹，軟足一日！

又係同一個星期六，老佛爺破沙喉兼痛風發作！唔飲水，梗乾梗發啦！

氹唔飲、 鬧唔飲？！唔飲，我就水都唔煲！！口乾嘞，飲啖凍水？！

佩服佩服，冷天飲凍水！！

腎虛飲凍嘢，咪又瀨尿囉，咪又係我抹囉！！！

成日大大聲嗌死？話我假心對佢！

有次，我成全佢，手執佢衣領拉佢去窗口開窗 。 。 。

拗底？得把聲，嚇到佢急急腳趴返上床兼收聲 (佢唔要咁死喎？死，有得妳揀點死㗎？)！

我呢，我容忍人、事、物嘅耐力極強，但係呢，如果我要做你呢，我係嗰種，一嘢令你冇得翻身嗰種人！(衰 s 係近期佳作啦！)

我唔介意人哋當我傻閪唔出聲，最好你當我冇到，我樂得逍遙與寧靜！

但係好似嫲咁，長期嗌死死死自殺死呢啲呢，就要教訓嘞！我搏命幫妳扶妳陪妳行最後呢段路，妳唔行仲褪？死，可以，但唔係捱咗咁多鑊杰嘢而家至嗌死，應該一早死！

搞到我呢，噚日五、六點喺廚房講粗口鬧個天！
老天爺，考驗得咁密集真係攰㗎！返工喺巴士，已經歉疚死講粗口鬧個天！

把口話唔理，噚日五點又死起身，煲去濕滋潤水佢飲。

今日五點又死起身，炆佢鍾意食嘅腩肉大墨魚。

嫲，唔飲夠唔食飽，思路都冇咁清晰啦！得嚟妳咁，咁多嘢想咩？死，都想幾籌經常想咩？！

妳唔提起，我都醒唔起可以死咗算，我呀，我忙到唔識想呀！ 睇怕我要分啲嘢俾老嫲做，等佢冇時間想咁多無謂嘢！


昭然

笑！

'笑話' 。 。 。

每朝返到公司，先開腦、 再打咭、 擺袋摺衫，第四件事必定去洗手間洗手兼洗嘴 (係係，我應該有啲啲啲啲潔癖！)。

我晏返嘅，必定遇到佢 - 清潔工大馬姐姐。

見到人就梗係打招呼兼講幾句㗎啦！

今朝，佢話見到我真好，佢好鍾意我喎？！原因係 。 。 。

我笑得好開心，佢好鍾意見到我喎？！？！？！

我大笑，咁苦命都話開心？我，苦中作樂咋！

當時個心，有，啲啲痛！

相信，我嘅和顏悅色之術，已經煉達爐火純青之境！居然，扼到咁多人？

- - -

晏晝，老細行埋我位問我 o 唔 ok，又問好唔好玩？

真叫人滴汗！

我話唔好玩，嚇餐死就真！

老細哈哈哈哈大笑住走開！

* * *

大馬姐姐、 老細，黑仔如我都能令你哋開心咔咔笑，原來，我仲有其它用處嘅！

多謝你哋，俾我睇到個天同我開嘅玩笑啊！


昭然

藍

藍！

一身藍！！

心更藍！！！

囑日臨收工，俾 Windows mail 跣咗鑊杰！梳打埠大客即開大會，兼喵嚟要 explain！！

我做細嘅即時自響仆街了，班坐房倒屎圍埋傾！昭然謝到聲都冇埋，自責死！

噚日老細成日唔喺公司，今朝一返，成班倒屎 + 我大佬 + 我入房閂門坐低傾。 老細冇鬧我，房內房外都話我冇錯，係 Windows mail 錯，老細仲安慰我！

老細，我噚晚內疚咗一晚呀！你仲咁溫柔話我冇錯？！

我諗，我喺梳打埠亦已打響知名度！！臭名遠播呀！！

年尾，連整兩鑊？！我唔恨升職，但係我極想加人工！！

噚晚，死狗一條去見占卦師傅; 嚟緊嘅十二個月同 2016 都唔見得好？！？！？！

唔順就梗，順啲咩，又要破財！又會俾人扼感情扼金錢，又會仆吓街呀咁？！？！？！

唉，好撚悶！

師傅講講吓，話佢自己成晚冇句好話講過，自言自語話真係咁差？佢忍唔住起個簡盤睇…

今日一身藍，係師傅叫嘅！我連 bra 都係湖水藍，夠晒聽話！

師傅講得冇錯，我對上嗰個冇幫我，但我對上再對上嗰個好幫我，多謝，老細！

咪話唔提各好友，用 Windows mail 寄喵，要睜大眼睇清楚至好 send，佢個仆街會自動 add 個無關痛癢嘅 address 上去㗎！

我噚晚就係咁領嘢！我哋個 IT Technicians，噚晚同樣咁領嘢！！

大佬 mail ，我呢行高度機密咪咁玩，會死人㗎！

各位，帶眼睇喵！！

Still in blue 冇心情！


昭然

想~死~？

有日，收工返到嫲屋，未見老嫲又好似上次咁坐咗喺地下，我又係唔夠力扶佢，又搵咗鄰居太太幫手，嫲又係怨死唔去 。 。 。

唉，我都受夠，力出咗咁多都夠啦！真係好攰，乜都得我一個做，佢仲成日想死，想死嘅其實係我！！


昭然