風中趕~~~

半日假，喺 QE 被玩咗三個鐘！毫無指示又冇人問，害昭然排枉隊！ (唔只我㗎！)

醫生妹妹又係嗰兩堆廢話，陰影、cancer，又話嫲咁嘅年紀啦！

我講明冇食抗生素，佢話明白我嘅決定，佢照約 ct scan，我話照約，到時我可以取消！

泊嫲喺三樓，我落去俾錢攞藥，嘩，排百幾二百籌？！

排排吓、電話響，又要跑上樓攞約期紙！

你話 make sense 嘛？見醫生 12 月 31 號，但 ct scan 就約咗 16 年 9 月 26 號？！？！

我梗表態啦 (昭然，唔係傻嗰囉！)，結果，佢收返 ct scan 期紙再約喎，睇吓到時又點！(你話係咪廢？有腦都會諗吓啩！)。 乜都冇喺手，31 號嚟到同你 say Happy New Year 呀？！？！

好，又折返等攞藥; 嘩，群情洶湧！

睇清形勢點玩法，原來輪椅可優先，又即跑上樓推嫲落去等打尖。

攞完一大堆藥已經 1650，剛掛八號波！

問嫲，駛唔駛著雨褸？

唔駛，好，捉實、坐穩。 。 。

兩嫲孫喺 QE 條斜路碌住落，目標趕喺打工仔放工前同橫風橫雨前，跳上巴士！

好彩打尖攞藥唧，1720 返到豪宅附近。

請咗假至打風，表面蝕晒！

但我咁諗，我唔駛同班奴隸逼車，同埋唔駛搭我至憎嘅地鐵喎，賺晒至啱！

菩薩保佑，對昭然嚟講，今日叫順㗎啦！


昭然