2014

66.36 。 。 。

2013年秋天，某夜，好少發夢嘅昭然發咗個夢，夢裏面見到我本紅簿仔剩返 66 蚊。

醒咗，我唔驚，相反，期望呢日成真以證我唔係普通人。

回流返嚟三年，不停跌錢; 裝修駛咗四十幾個，未計家用仲加上每月醫病六千大洋！要戶口變成 66.36，冇難度啦！

咁，唯有病住都求其搵份工頂住先啦！

噢，世事專玩霉友，遇著早過年添？！

問，做大生意嘅老同學借三千，再加上有個成日想借錢俾我嘅家庭主婦; 六千，慳慳哋夠過年！

記得，老同學笑昭然三千都要借，夠我駛幾多秒喎！

記得，流住感激嘅眼淚喺家庭主婦手上接過三千！

同時，有債仔還錢俾昭然，我又即時還俾債主s！ (六千，手過手，搵嚟搞！好好玩咩？！？！)

昭然條過山車命，就係咁離奇！

一月問人借錢至過到日，但四月至九月，駛完都儲到六萬喺戶口 (我咁大駛都儲到六萬喎？！叻得我吖！！)！！！

呢世都會記得 。 。 。

第一次要問人借錢過年關，真折墜！

識咗家庭主婦十多日，就主動仗義！

* * * * * * * *

我唔係冇錢，我唔想郁啲不動產s啫！

我唔係冇錢，我條命，財根s好壯嘅！

但係，咁玩法又嚟得急，幾壯都死！

又新嘅一年，又唔知有乜新體驗呢？

所謂體驗，其實係突發地又急速地，重複喺唔同嘅人、事、物上，反複咁玩奄悶之極！

新年，望有新景象，咪又再奄奄悶悶！


昭然

迫出火 ╰_╯

因為呢份工，今晚… 大喊！

五個月零十八日，食咗數唔掂咁多死喵，執過唔知幾多爛尾！

今日唔爆佢老母都對唔住昭老母 (雖然同昭老母唔多熟絡，但昭然都記得有人痾出嚟㗎！)！

下午，坐房人打電話問昭然點解由八月起嗰個客啲嘢我喵咗俾第個？(嘩，昭然會唔會咁呀？！工作能力呢瓣，昭然對自己絕對有信心囉！)

昭然話冇，我冇見過嗰個名，從來都係直接喵嗰個客！

叫昭然 check 清楚，唔係我錯又點會錯？(嘩，你咁講，冇嘢講喎？！check？咪嘥昭然時間啦，我有幾忙冇人知囉！)

我問係咪個 system 有事？我仲話，佢咁講，我唔駛 check 喇，咪當昭然錯囉！(繼而大力 cut 線，嗯！)

收線後，諗起可能係白痴會計仔; 點知，真係！(昭然太聰明嘞，唔怪得睇相佬都叫我扮吓蠢，免得鋒芒更露！)

昭然，一嘢走入佢房 blah blah blah，最後叫佢同會計部講吓小心啲，下下要昭然個位食死貓，唔掂囉！

嗯！

出房，昭然再電白痴會計仔，叫佢以後要咁咁咁，咪死得人！(昭然呢行啲嘢高度秘密！出錯嘢？死罪囉！爆大鑊俾老細知道，剷完即兜呀！)

收工，坐房人嗌出嚟問係咪得昭然一個，我冇答，佢再問，我敷衍細聲答 : 唔！

佢走，又話得番昭然一個要小心，我又敷衍細聲答 : 唔！

入屋，手未洗就攬住嫲大喊，嫲出嚟問昭老細知唔知，叫昭然 gut 返佢！(哈，堅！下下搵老細咩？！正傻嫲！)

乜乜柒柒昭然都忍，俾仆街屈完又屈、擺上枱反轉再反轉，昭然都哽！但，有極限囉！

襟 diu、爛做、唔嘰 gut，昭然一直遵行緊喇，仲要我點呀？！？！？！

喊、大喊、大滴眼淚、兩行淚痕，委~屈~！


昭然

硬受！

噚晚，昭然邊拉筋邊嚎哭 。 。 。

喊到滿面眼淚鼻涕起粉癮咁，仲扯埋蝦！好難過、好淒涼、好無助！！！

因為盤骨底 (坐骨神經位置) 痛返個幾月，只有愈嚟愈痛仲牽扯到尾龍骨、頸膊？！

人老、 退化，我明！

但昭然先天不足，加上自少做粗重家務，跟住後母嗰幾年又營養不足仲要擔驚受怕俾佢虐待！又加上喺鬼域捱壞兼受氣，冇得食又唔夠休息！回流返嚟幾年，又頻撲又勞心力唞唔夠！夾夾埋埋，昭然退得更快！

呢個幾月，我深感距離做手術用 stick 癱喺床做廢人嘅日子，好近！

唔係怕痛怕獻世怕長期食糖嫌醜樣唔靚，係怕昭然有事，冇人撐起兩頭家同照顧家中瑣碎兼老嫲啫！

邊喊邊嗌滿天神佛名號，連土地、地主、外姓街仙乜都嗌，總之識嘅就嗌，嗌佢哋幫手撐住昭然棚賤骨頭！就好似，細路仔喊住嗌亞媽咁！

表面好人好者嘅歲月剩返唔多，昭然要同時間鬥快，喺我出事前要盡快儲夠錢，搞掂埋呢間爛屋至有命！

投胎嚟呢個屋企冇嘢好，最大獲益係學曉如何，逆~來~硬~受 • 絕~處~求~生！！


昭然

團圓？

有年喺鬼域，臨近中秋，唔覺意聽到中文台嘅新聞，廣東台訪問南下嘅打工妹。

北妹開口就喊，因為嗰年佢冇得同屋企人過節！

昭然跟住都喊，因為我離屋企更遠更耐，所有節日唔記得冇過個幾多年，昭然老嫲比佢老媽更老我心更痛！最重要係，昭然已經數唔出幾多年冇食過月餅、糉、角仔、年糕、豉油雞、紅衫魚同青邊鮑嘞！！

所以，嗰年嘅下一年中秋，我求人幫我買盒奇華五仁金腿月寄俾我; 點知，坐過飛機嘅月餅可能嚇過下，唔好食嘅！

回流返嚟三年，一直都係奇華擁躉，不過佢愈做愈衰？！？！

大同餅家，幾個月前只幫襯過一次買禡仔同香蕉糕，但昭然已經選定佢同佢買月餅嘞！

唔，冇令我失望，好好好好好好好好食！

如果，昭然喺食呢方面嘅慧根放喺揀男人上，咁就冇死嘞！

哈哈哈哈哈哈哈哈…

返嚟陪老嫲，除咗打亂昭然喺鬼域嘅計劃，仲犧牲埋車車！

四個月餅承惠 279？！

嗰刻，昭然個心揪住痛，痛住俾錢！

車車嘅 number plate 就係 279！

X279XXX，車車，永遠喺昭然心！


昭然

嘻哈喊

食神寵嫲孫 。 。 。

今日，除咗買到真嘅白飯魚，仲居然買到條三斤重嘅鷹䱽！

嘩！嘩嘩！！嘩嘩嘩！！！

稀客登場喎，奴隸孫即刻喺廚房恭候啦！！

結果，1743，嫲孫就坐咗喺企食晚飯嘞？！哈哈哈哈哈哈哈哈…

(嗯嗯，兩位稀客嘅身價，承惠 $730！多謝，佛菩薩！蓮花弟子，感恩！！)

•
•
•

噢，開開心心打緊上面堆字！俾韓劇女角嘈到望吓電視，唔望好地地！

講佢死老豆，老豆正推入火爐火化，女角隔住玻璃邊喊邊！

劇情似曾遇見，同昭然死老豆時嘅情景一樣，絕對一撚樣！

當時，昭然十隻手指好似青蛙咁啜住塊玻璃，睇住自己用箱頭筆寫咗老豆姓名嘅棺木，既慢且快咁轆入嗰堆噬人嘅紅火！昭然，呢世都記得！

人呀，淡夾苦、苦帶澀！甜？假嘅！

真掃興，係都要昭然喊！eeeeeeee… >.<


昭然

唉，黑呀！

今朝擘大眼 0839，嘩？！

嗱淋洗刷梳著，仆住跑！

落到街，見兩批亞婆為數六個八個，擔住遮等緊的士？！

要的士，當然冇的士啦 。 。 。

即刻又臨急抱佛腳，求土地公公出馬啦！

結果，的士就班唔到俾昭然嘞，班咗架大賓士 (巴士) 過我; 簡直人生交叉點，上定唔上？！

嘿，反正都遲，慳返的士錢都好！一於，上！

0846 塞喺橋 。 。 。

碌落車，又擔起把遮起勢跑呀跑？！

嘩，仆倒返到公司，離遠望到咭機 08:59:12，發達冇遲到！

發達？破財就有昭然份！

今朝隻豬腳，踩爛副三千幾蚊嘅眼鏡呀！最重要係，嗰款鏡片唔出㗎喇！！ %>_<%

黑嘢點止咁少吖，冇心機呀！


昭然

亂？！

臨天光又發一夢！

唔肯定係咪泰國、東南亞定南亞地方，總之人民黑黑啡啡嘅 (夢裡面，昭然同自己講係泰國); 好恐怖，昭然親歷人禍同當地人民一齊慌忙逃難，仲同斬人兇手對峙，有幾個唔識嘅 '人' 幫忙出大較剪救昭然 (夢境就係咁荒誕，鋒利斧頭對大較剪？！)！

最後，昭然結手印行禮唸經，懇請南無大慈大悲觀世音菩薩出動護航！現實瞓喺床嘅昭然，亦即時開口大聲唸經配合，當時真係好危險！

回程時，見到有人切菜煮人頭食！最後，有'人'安排咗架好特別嘅'木頭私家車'俾昭然自己揸走較腳，得以脫離險境！

到底嗰度係地獄定泰國？過一排就知！

總之，好驚！真係，好真實、好驚！！


昭然

追、跑！

為咗食，肥妹昭然可以去到幾盡？

中環萬邦行覆完診，行上 '公利' 買庶汁同庶汁糕，又行返落去搭叮叮落銅鑼灣送兩盒糕俾 facial 姐姐試吓; 跟住乘機行吓街，再轉落 SOGO 買至愛嘅 DONQ 麵包，再搭巴士返灣仔 '福記' 買外賣。

兩年冇去灣仔 '福記' 樓上 (我仲有買外賣同年糕㗎)，大經理行嚟行去唔認得肥妹嚕！外賣一出，大經理大嗌昭小姐，劈頭第三句就問嫲喺唔喺度？！

啋啋啋，嫲就嚟九十五喇，鬧肥妹仲鬧到渣渣聲㗎！跟住，再寒暄吓咁囉！

現實就係現實，必定勢利！

啲細嘅見肥妹昭然同大經理傾咗幾句爛熟咁，當堂笑容都唔同？！即刻㩒部貴賓俾肥妹嘆！！

俾啲啲時間昭然，我一定會再起東山嘅！

計劃已喺腦內係咁轉，只要儲夠錢就將計劃實行 (其實唔駛儲嘅，係昭然呢啲婆仔格唔捨得賣嘢啫！而，事實，昭然睇好嗰樣嘢，再揸吓應該仲會升多幾個位，點捨得賣唧？！)！

雖然，未必追得返層水塘樓返嚟！要袋返張 '福記' 貴賓咭喺銀包有幾難唧？！更何況，攞住某張信用咭行上去就有折頭啦，貴乜嘢賓咭唧！


昭然

臭不可聞

朝早八點幾，同冬菇亭開茶嘅好姐，對話如下 :-

好 : "乜今朝咁早呀？"

昭 : "係呀，瞓唔著呀嘛！"

好 : "開住冷氣都瞓唔著？"

•
•
•

昭 : "嘩，乜朝早咁多男人嘅？"

好 : "朝朝都咁多㗎喇，係妳冇啫！"

昭 : "臭嘅！送俾我都唔要！！"

好 : "咁呢句又真呀！"

跟住，兩個女人咔咔咔咔互望大笑…

okay okay，咱們西一樣臭，okay ？

人類殘酷無道嘅坑臭事蹟，早已傳遍整個星際宇宙間喇，又豈須昭然嚟宣臭？！


昭然

Friday

間唔中早返望到電視，嘩，識郭晉安咁多年，都未見過佢咁樣奸笑嘅？！

最後，最奸應該係 。 。 。

我估，舊年視后 😉

今年視帝同男配角仲唔係出自呢套劇？

Friday，嫲孫倆食完 pizza 唞番兩日先！

我份工、我個位 chur 到冇字啱嚟形容！總之就，驚嚇時分秒仲要求無限高兼而有之！！！

連續三個 Friday，臨收工鑊咗嘢？！

雖然補救到，但昭然呢啲同樣要求高嘅人，唔容許自己咁囉！嬲自己睇漏咗嗰啲啲而咁囉！老細冇鬧我，但唔開心㗎，令老細喺出面冇面個朵臭，我唔開心㗎！

工 chur 又好，自己 chur 自己又好，總之就係 chur！！！

chur 到，夜晚收工返到嫲屋都冇力做家務！唯有朝早返工前掃地、抹地、備嫲嘅餸、備兩個生果盒、洗廚房嘢、throw rubbish…

chur 到，頭髮係咁甩 + 勁水腫？！

唉，做昭然呢世人無撚謂？！？！？！


昭然

幾重準則嘅地球 。 。 。

噚日朝五點幾整咗餐俾嫲果腹，十一點幾再同佢去飲茶; 飲完，昭然趕去中環，趕路中，不忘買庶汁餵嫲。

嫲飲汁期間，昭然死去廚房浸乾瑤柱，準備唞陣滾勝瓜、魚肉、豬肉丸、雲吞湯加人哋自家製麵條做晚餐。

點知，七點唔夠，老佛爺話佢唔食唔駛預佢？！？！？！咁我，又薯片、餅乾做正餐啦？！

今朝，奴才遞上暖水俾老佛爺食血壓藥 。 。 。

奴 : 駛唔駛而家熄火同妳去飲茶呀？啲湯仲要煲多兩個鐘呀！

嫲 : 唔好，繼續煲啦，我瞓多陣。

奴 : 點解噚晚唔食又冇事嘅？前晚就鬧神鬧鬼嘅？
.
嫲 : 我都費時同妳講！個胃頂住唔知餓……

奴 : 咁咪即係唔舒服囉，要去把吓脈㗎啦！陣間買山楂、 麥芽整俾妳食開吓胃好唔好？！

嫲 : 費時同妳講……………

喺公司又係咁，老細下達意旨，昭然做細嘅梗係要跟啦！點知，有事發生時，就另一標準擺在前？！？！？！

我知，做生意係咁㗎嘛！

昭然冇事，我呢個外星生物已經習慣人類嘅遊戲規則㗎啦！外星生物適應能力遠超人類，昭然冇事！(唓，有鬼理我有冇事咩，費話！)

只係 。 。 。

幾時至可以，昭然 go home？

返 home 前，飲碗花膠湯養吓筋骨養吓顏先 (我係昭然唔係 ET，似 ET 咁，皺晒皮返 home 就唔好睇啦！ ^_^; )，九點八有得飲！


昭然

哈、哈哈、哈哈哈 。 。 。 。 。 。 。 。

呢個星期，雖然只係返四日工，但一啲都唔好過！

處處犯小人、件件煩？！

最後，梗係昭然硬哽！！

噚晚 o 完，九點九返到嫲屋，嫲瞓咗、一地慣例污糟！

除衫、閂門、抹地，搞到唔知幾點坐低食兩包 crisp (冇食晏，早餐只食麥皮)！半夜三更見嫲瞓得林冇問佢食唔食，昭然身心癲攰，瞓！

又瞓到唔知幾點，嫲起身摷嘢食？！噏噏尋尋，最後嗰轉佢問昭然做乜咁早放工唔買外賣？！

WTF？！

朝早出門前問妳，叫我唔好買！！跟手話佢自己日日冇食晏？！

我答 : 而家係天濛光唔係夜晚，妳俾我瞓多陣，得嘛？！

我講 : 噚晚返到嚟，又一地污糟，我又抹，仲想我點？！

我話 : 係妳叫我唔好買外賣，返到嚟見妳瞓咗，我點敢叫醒妳？！

(期間，夾雜嫲嘅怨言，話佢冇餐飽呀、有餐冇餐呀 。 。 。 )

真係 Wot ta FUCK！！！！！

我再話 : 我整好晒俾妳，妳唔攞嚟食，我仲可以點做？係咪要餵埋妳食？！妳日日搞到咁污糟，我冇出聲日日抹，仲想我點？！

(嫲繼續怨天怨地 。 。 。 )

我求佢 : 妳俾我瞓多陣得唔得？一係我而家同妳去食…

(嫲繼續講講講 。 。 。 )

我起身、執床、準備返自己屋！(嫲見昭然執嘢就收聲㗎喇？！但係，收前整多句 。 。 。 )

嫲 : 係囉，走咗唔好返嚟睇我囉，橫掂我都等死、我好想死呀……………………

唏，最憎人成日以死相向嚟要脅我，昭然唔受嘅！我著好 bra、入廁所，好平靜咁小個便準備執嘢走 。 。 。

小緊期間 : Well，菩薩，袮哋擺咁多逆行菩薩嚟試昭然嘅？諗起一雪櫃嘢食唔想嘥，小完洗手、除 bra 煮嘢食，我食完六點四個字？！？！？！

黐線！晨咁早食嘢？昭然夾硬哽，真折墮！

噚日朝，倒水俾嫲食藥時，佢話邊度邊度痛，我 book 咗見醫師仔，但我知實唔去！總之，昭然得星期六有啲啲時間同妳去，平日妳咪旨意我請假！

係咁多，要講呢個迫癲人嘅人生，講唔完！瞓！！

哈，星期一又開每月大會，呢幾日鑊鑊都有昭然份食死貓，睇我到時點俾嗰幾個坐房賤精隊死？！

呀，昭然喺隱秘公司做咗三個月，就有幸參與每月大會前一個鐘嘅管理層會議，到時實被插到應一應，失血過多而死！


昭然

∩__∩y & ╰_╯

回流返嚟三年，噚日，終於，唔駛俾人鬧！

"你好，醫生，我哋又見面啦！" (昭然，真係愈嚟愈假 =.= )

"今日唔駛你勞氣鬧我喇！" (昭然呀，被鬧到奀咗皮 ^_^; )

三年、 三年，每次同嫲覆診，血壓都超標？！？！？！

噚日朝居然，137/71 pulse 59？！

"我唔係鬧妳，我緊張提醒妳啫！"

其實，呢個醫生仔唔係最惡，最惡係林醫生 (女醫生)！佢呀，嗯！

"我都唔知妳搞乜嘅？梗係食外賣嘢搞到佢血壓咁高啦！冇好好照顧佢啦！俾妳咁搞落去唔得呀，要即刻入醫院呀！"

原來呀，人呀，真係犯賤！俾嫲食用清淡就超標，而家我唔得閒煮飯，間唔中要食外賣嘞，嫲就正常？！？！

三年嚟，每次同嫲覆診昭然都撲餐死，血壓有冇高我唔知，但心跳加速同緊張就一定，又有邊個問候我吖？冇人幫我仲要鬧我，真混帳！

囑日呀，我一見到呢組數字彈出嚟呀，我開心到好似中咗六合彩咁！ \^o^/

多口問醫生仔嫲啲牙可以去邊搞，佢俾咗資料我，我會即刻 book 去 consult 再睇吓點搞; 呢十萬八萬唔慳得，嫲唔想都要佢擘大口㗎喇！冇牙點食嘢吖？牙有事點做人吖？

"多謝你呀，醫生，多謝你，下次見！"

"唔駛多謝我，辛苦妳就真！" (醫生仔繼而合十)

昭然，連忙合十、鞠躬回禮！

啊，原來同道！

懷住開心心情步出健康院，又急急腳推暈陀陀標冷汗嘅嫲去飲茶！(梗係暈啦，前一晚冇食嘢，噚日又熱，仲要等三架巴士至上到輪椅！)

一坐落，即爬兩大碗飯加幾味餸，安樂晒！嫲食飽，我就同朋友邊食邊傾！我同朋友各湊一個人，佢女、我嫲，相映成趣！哈！！

再同嫲返去我屋企附近巷仔剪髮，洗剪吹，嫲好享受呢！見嫲舒服又滿意，我就俾十五蚊 tips 啦，齊頭六十，肥姐拜拜！

噚日熱到呀，返到嫲屋同佢抹身再迫佢飲水，嫲就豬叫咁瞓咗兩覺！

好啦，今朝嫲一擘大眼就計劃陣間去冬菇亭食乜食物啦？！

而家九點五十五，嫲飲緊昭然六點起身煲嘅黃耳養顏健脾湯，fling 住對豬腳飲㗎！不過，嫲彈昭然煲得麻麻哋好飲㗎咋！吹脹！！

嗯，仲有對面鹹濕佬！噚日返到屋，我第一時間梗係抹輪椅兼抹地啦！

抹地就梗係打開木門抹啦，要抹門口順便吹吓屋㗎嘛！

點知，鹹濕佬連呢啲啲時間都唔放過，即刻打開鐵閘更加將張椅正正對住睇戲咁？！？！？！

我急急手抹完門口即刻閂木門，跟住喺防盜眼睇住佢冇癮即刻閂閘？！？！

你再咁唔要面，昭然就設局裝你個撚樣，搵次打開門露兩隻小腿引你企喺我門口，快快手影你個仆街再去投訴或報警！

昭然放生你，你就當我懵閪，好多嘢昭然唔郁啫，我一出手唔會有生路俾你行囉！

老咗都咁撚賤，正撚樣！

枉亞嫲仲話裝碗湯佢飲！ ╰_╯


昭然

激撚死！！！！！！！！

半夜 2338 做完趕死狗 facial 返到嫲屋，又反鎖摸門釘！

已經不知叫過幾多次唔好鎖門，有乜事佢又聽唔到！

企喺門口，打咗廿多分鐘電話都聽唔到？！對面鹹濕佬一直企喺度睇！！

諗過等通宵巴士開工返自己屋企，但今晚冇 ot， 聽朝一定要早返，更何況昭然好攰！

而鹹濕佬又一直企喺度，我驚佢有進一步動作 。 。 。

零晨 • 昭然 • 最終 • 決定 • • • 大力破門而入！！！

爛門框最終落敗瞓喺地，以後冇得再鎖門嘞！

唔嬲就假，我錢都唔搵放棄所有計劃同車車，喺鬼域特登返嚟陪妳服侍妳，叫妳唔好鎖門啫，咁都要激昭然？！？！？！？！

真係，做人唔係咁呀，咁過份呀？！？！？！？！


昭然

笨柒係我？！

終於完成其中一項，艱巨而每星期又必須要做嘅任務嘞！

同嫲洗頭、沖涼、捽老泥，比武咁！

我洗就我洗啦，佢又要加對手隊隊吓？！昭然又驚整親佢，驚險就係喇！！

一路洗，嫲就一路吐口水，仲要吐正昭然塊面？！

又驚冷親嫲，快快手做好我嗰 part; 俾嫲自己玩水期間，昭然一身汗一面口水汗水洗頭水，就拿淋出去抹地。 嫲行路驚跌，所以唔著拖鞋赤腳通屋走㗎; 如果唔即刻抹地，沖乾淨涼等如白費！

抹乾淨地，又要同老佛爺抹身、梳頭、撩耳、撩肚臍、護膚、著衫！慢啲都唔掂！！

跟住呢，又要仆返入廚房準備嫲幾日嘅餸，洗切醃包！

跟住呢，到自己沖涼洗衫！

仲未計晨早六點起身煲湯，十一至六陪嫲喺街 hea！以前，夜晚仲要煮飯呢！

禮拜日，可以坐低唞，唔多過三個鐘！

做咗兩世孝義女，感覺認真搵笨柒！

下世，我要做仵逆仔，乜柒都唔理！


昭然

死做！！！

今日飲完茶坐公園，兩嫲孫一人一支雪條在手，損完涼透心！狗仔伯俾幾粒新鮮樹上摘荔枝兩嫲孫，好甜唔澀又多汁，好食！

表面寫意兼開心？！

其實，兩嫲孫，過咗個唔易過嘅一星期 。 。 。

昭然，唔駛講，工作上忙到唔識形容！(冇生意又邊有紅分吖？)

前個星期，嚟個銀行界八十後，頭半日就知佢沙沙滾冇料到，玩四日辭工，老細叫佢三日半好走！搜完袋、 check 過手機，專人送佢出門口！！！佢臨走，問專人嗰半日糧點計？我老細喺房已講豪俾佢，無所謂！真度縮，昭然就唔敢問嘞，做銀行即係做銀行！

嘥我時間、 口水？！？！祝渣打好運，佢去渣打見工喎！

繼而，老闆娘話調個隔離 team 嘅八十後嚟 assist 我！我一口拒絕 (雖然佢喺隱秘公司只係一星期貨仔，但憑昭然法眼一立，就知佢唔掂，咪玩我啦！)！老闆娘建議我，只教佢做死一樣嘢咪得囉！

四日，只做同一樣嘢，佢都可以慢慢拖仲錯嘅？！？！

屌，冇心撈就咪阻撚住！古鳩怪，唔係抹呢度就執嗰度，再唔係就踎低搞吓嘢？！？！

辦公時間做嘢吖，唔該！

佢只啱打政府工，入形入格呀！

俾呢兩隻八十後害昭然做唔到嘢，仲要 check 佢哋做過嘅嘢，咪仲嘥我時間！

幫昭然？害昭然就真！

嫲又趁昭然未做死，加入搞吓事！

嫲，牙肉發炎、 面腫、 痛風、 發燒齊齊嚟！

嫲，例牌啦，有性格唔著尿片㗎嘛！

所以，每晚 ot 完一開門，除咗冷氣撲面涼浸浸; 隨之，就係尿味撲鼻，眼見黃尿灘灘？！

除咗返工衫，又開工做家務啦！換床單、 抹身、 抹地、 洗床單、 洗褲、 洗自己……！！！！！！！！

每朝早，晨早去買白粥呀、 腸粉呀、 麵包呀、 去冬菇亭買點心呀、 又買定晏晝飯入暖壺俾嫲呀！嫲唔舒服，買多樣化嘢食，希望有樣撞啱！

朝朝唔夠七點三，已行咗一大圈，仲買到兩手拎唔晒企喺口？！所以，昭然都唔知自己幾點起身落街？！只知道，唔買，嫲就冇得食！！

街市嬌姐問昭然做乜咁早？佢搭我叫嫲著尿片 : "唔著片，想做死人咩？"

陪嫲食完早餐，拿嗱聲沖個凍水涼，頭濕濕腳急急又換衫返工！

嫲問幾點？佢話八點咁早咋！

吓？！平時八點，昭然已埋位做緊嘢喇！

每晚放工已九點十點多，返到嫲屋冇乜選擇，只有麥麥送救兩老女人！Double Fish Burger 好食，但食厭喇！！

呢個星期嘅日與夜，大概就係咁過？！

忙，忙到冇力煲湯！半個月冇湯飲，對昭然嚟講，會死㗎哇！！

見嫲今日精神啲冇發燒，昭然心情都好啲，我唔飲都想嫲飲啖湯補充吓！

聽朝，會煲花膠湯俾嫲飲，補吓筋骨！

今朝，昭然一覺瞓醒已十點廿二分，好少何瞓到咁晏？！昭然唔係嗰種，放假就死瞓嘅廢人，證明，昭然攰到透透哋底！

今朝，嫲俾二百蚊昭然，話飲茶、 買餸同買尿片！又問尿片幾錢包？我話，有二千幾生果金買餸夠妳食，尿片係菩薩俾錢嘅，叫佢問菩薩幾錢包啦！嘻嘻嘻…

m 到暈暈哋，今晚依然死撐蒸魚煮飯俾嫲食。

嫲，盡情食、 食好多！

公與私，皆為人忙？！

苦命呀！！！！！！！


昭然

周末當平日

ot 完喇！

八點唔夠開工，六點走，五點前打咭收工，即係蝕一個鐘！ (其實周末返工，昭然唔知有冇錢㗎？係會計仔叫我打咭㗎咋！搵機會要同老闆娘傾吓，佢唔想俾都冇所謂，昭然唔係呃錢！)

嘩，啲喵覆遲啲都唔掂，班客 chur 到呀？！我唯有用有限嘅英文氹番佢哋啦！！唉，昭然而家衰過做雞呀！！！

真係要同高層講講，而家得昭然一個就唔好成日嗌我 disturb 我，要睇餸食飯嘛！

幾個坐房人，一日嗌嗌嗌，昭然慘過狗奴才！！！！

工作未做妥，噚晚夾硬去睇尾場草蜢，搞到昭然心不在焉，個腦未停過諗喵點覆點兜！！

呢兩日唯一一件好事發生喺昭然身上嘅，要數 ot 後行去搭巴士嘞！

距離十數米，巴士已埋緊站！心諗，唔係呀，攰死仲要腫脹昭然跑街？！？！？！

又諗起，禮拜六走車有排等，鬼叫窮咩，跑就跑啦！

好彩司機哥哥好人等埋腫脹昭然咋，喘住氣唔該、唔該、唔~該~晒~！！！

好喇、好喇，返嫲度抹地做家務兼小丑啦！

想擁有昭然嘅周末嘛？平日呢？

目前，有錢搵、有飯開、夠 pay bills 就得嘞！生活，將昭然磨得滑晒釾！

冇日、冇夜、冇閒、冇適！！！！

一一證實，昭然，曾經凡間走一回！

呵~呵~~呵~~~


昭然

落閘

原來噚日 black Friday，工作上遇到嘅… 黑爆囉？！？！

昭然喺隱秘公司做咗兩個半月，平時已經忙到冇停，噚日直頭癲嘅，得昭然一個就咪蝦我啦！！

好多喵仲未覆呀！死啦，禮拜一實被叫入老細房啦！！！

已經喺地鐵車廂，返去 OT 呀！問準老闆娘，至返得去㗎！！隱秘公司唔准低層如昭然，一個人留喺公司㗎！！！

解籤哥哥話呢份隱秘工，要到農曆八月至會定腳！一份工捱頭半年，可接受吖！！

若然，有邊位想約昭然食飯，咪預我住喇！農曆九月至見喇！！

除非，期間冇得撈嘅啫！ Q_Q

好，正式，落閘、閉關！！！！


昭然

困境？

沖過凍水涼、執吓嫲間爛屋、同菩薩請過安，出門返工囉！

今朝嘅凍水涼令昭然悟到，凍水照頭淋未係最難捱，最最要勇氣面對嘅，反而係抹好身出到有冷氣嘅廳！

人生有困境出現時，困境未必難搞，最難捱嘅反而係外來人為嘢！

人生，總有低潮不順時，千其唔好將難題放到咁大啊！亦唔好期望有人幫忙安慰，嗰啲人唔踩多腳已經係幫忙喇！

好，已企上巴士，返工去！


昭然

六月頭 。 。 。

剛過去嘅一星期，必定要記低 。 。 。

衰 S 五月尾講昭然聽，佢自己卜易經卦，卦象話佢而家喺隱秘公司係 - "正義已經唔喺佢嗰邊，叫佢早走早著"？！？！？！

佢猛話好準好準，昭然心諗 "吓，妳理解錯咗呀？支卦話妳唔夠正氣冇正義，叫妳速走咋！"; 我望住個心術不正嘅九零後講佢自己點委屈，我覺得呢個世界嘅人類真係無可救藥！！！

六月三朝早，衰 S 爛型一返工就 send 喵俾老闆娘辭職 (吓，乜辭職都寄喵㗎？？？我遞信㗎！！！七零後同九零後，處事確係唔同？！？！)！

老闆娘叫昭然入房話我知，我開心到飛起！衰 S 俾一星期，老闆娘叫佢一個月，我話叫佢即走最好，對多佢一秒都嫌多！ ^皿^

出到房，衰 S 話老闆娘同佢講，因為昭然投訴佢態度差，所以佢收警告信！

我望實佢答 : "吓，乜淨係得我覺得妳態度差啫咩？妳對人嘅態度？改吓啦！" (都唔講咁多，免得教精佢！)

衰 S 冇下句？！

chock 我又冇下句？！

都唔知佢想點？！

屌，投訴妳就投訴妳，做咗俾人話都抵吖，昭然冇做過俾妳屈添呀，死肥閪！

六月五朝早，衰 S 病假！昭然以為佢詐病去考試，問候佢份卷; 佢話佢真係病，去咗打針喎？！(其實去咗勞工處呀！)

六月五下晝，嚟料、 嚟料，開波喇，好精彩！

老闆娘經過，叫衰 S 入房，衰 S 帶埋手機行，老闆娘話 "喺公司妳唔需要拎住手機啦，就算錄音，妳都要問過我至錄得㗎！"

衰 S : "呢啲係我個人財物，我想跟身安全啲！況且，我今日真係好病，我驚我聽漏咗、 misunderstood 咗啲乜嘢，所以想錄低妳講嘅嘢啫，我錄音前都會問妳㗎喇！"

"blah blah blah 唔係妳問，我就俾妳錄 blah blah，……… 咁唔好傾啦！"

(昭然聽唔清老闆娘講乜… 嘥咗！)

衰 S : "咁唔傾，就勞工處見個囉噃！"

老闆娘 : "好，就勞工處見喇！"

老闆娘轉身就請示佢老公 (呀，係老細，嘻嘻！)！

衰 S 被叫入老細房，有老闆娘、 另一 Director 同我臨時頂頭大佬，共五人喺房。

聽到老細講咗幾句開場 (又係聽唔清！)，衰 S 好似見到包大人咁，將佢嘅 "冤屈" 大喊大鬧大嗌咁潑 (潑婦個潑呀！) 晒出嚟？！？！？！

潑完出嚟冇耐，老闆娘又行去衰 S 身跟教佢睇糧單！

原來衰 S 唔識睇糧單，成日周圍同人講老闆娘扣佢錢？！？！？！

勤工獎係乜定義都唔識？唧唧唧，唔係九零後好叻，乜都識嘅咩？乜年代呀？！

老闆娘 "解釋" 俾衰 S 聽，我聽到衰 S 講咗三次唔好意思！！！

老闆娘話 : "唔明就問，搞到誤會咁深？！"

六月五收工，老闆娘講昭然知衰 S 喺房嘅醜態，又話衰 S WhatsApp 同 Skype 佢好多好多次，叫佢收返兩封警告信！！

老闆娘話衰 S 除咗唔識睇糧單，連警告信都唔識睇？！

警告信入面有一字眼 'fulfill target'，衰 S 喺房大大大大大聲話 : "我又唔係 sales 點解要 meet target 呀？"

哈哈哈哈哈哈哈哈… 笑到昭然同老闆娘合唔埋口呀！

唉，香港人理解英文嘅能力，真係差得交關？！九零後喎？讀多我兩年書喎？批評昭然英文差喎？英文信都睇唔掂，唔好講寫啲乜出嚟嘞，我睇見佢哋啲喵呀，真係毛管戙㗎！

六月六下晝，全體員工除衰 S 外入會議室有嘢宣佈; 由於隱秘公司跟 Aussie 嘅例，所以我哋嘅財政年度喺六月，亦由於舊年賺大錢同上月老細級出 trips 見大客俾客讚，又接到勁大嘅生意返嚟 (昭然覺得，因為衰 S 嘈完，老細想用錢穩定軍心)。

所以，六~月~出~花~紅~

昭然 date back 返五一已過試用期，啱啱趕得切用新人工分到 1/4 嘅糧做花紅，年資長嘅有 1/3 或半個月糧。

昭然兩個月貨仔都有 1/4 已好滿足啦！

隨後，老闆娘俾咗張過試用期嘅約昭然，我唔敢問勤工獎同飯錢呀，好似好小家咁！老闆娘話已請到人，想昭然親自教唔俾衰 S 打毒針。

我出房衰 S 恭喜我過咗 probation，我又望實佢 : "我過咗成個幾月啦！"

六月六三點幾，衰 S 被叫執包袱走嚕！

衰 S 邊執邊話 : "妳有問題唔明，一個禮拜之內打嚟問我啦！"

衰 S 臨走拍拍昭然膊頭 : "我走啦，拜拜！"

屌，平時我問妳嘢，妳都唔答㗎喇，仲入房同老闆娘講我完全唔掂添！我梗唔掂㗎，都冇人教我嘢講我知點做？！有，咪得我前大佬臨走教咗我兩日嘢咁多，同妳晦晦氣氣答句咁大把囉！

衰 S 激似毛賊時代三批五鬥嘅紅衛兵，一樣唔識嘢、 冇見識、 冇文化、 冇家教、 霸道、 野蠻、 衝動、 冇腦、 大話精、 口賤、 心毒，冇料到極點然後自我膨脹，每日就喺度踩我、 跣我、 dut 我？！？！？！

昭然唔會唔開心，只戥香港完全同狂國接軌而難過啫！似衰 S 嘅八、 九零後大把咁多，香港邊有得救！

衰 S，妳點同昭然鬥吖？呢份工係南無大慈大悲觀世音菩薩 assign 俾我㗎，我上到乜位、 幾時上一早知㗎喇！妳憑乜鬥昭然？

我喺隱秘公司兩個月貨仔，禮拜一就輪到我教新人喇！喂喂，有冇人記得昭然都係新人嚟嘅呢？！

解籤哥哥話，過咗農曆八月，昭然喺隱秘公司就定㗎喇！未來呢幾個月，要拼命搏殺呀！

噚日同醫師仔講近況 (係呀，如果佢未結婚，昭然會主動溝佢姐弟戀㗎！哈哈哈，因為佢好似 Winnie the Pooh 㗎 ^3^ )，佢恭喜昭然分到花紅仲贈句 "天地有正氣" 過昭然！


天~地~有~正~氣~


好，昭然鍾意呀！


正氣嘅昭然

狂人日記！

嘩，昭然對黑眼圈呀 。 。 。

嚇親街坊呀！

壓力大到，爆瘡添呀？！半世女，生唔多過十粒瘡，為份工喺額角居然生瘡哇？！？！？！

加一千生一粒瘡？package 嚟㗎？！？！

今日俾班客嘅問題煩死，同英、 美、 澳、 法、 德 agent 喵嚟喵去，又要引導班蠢客又喵嚟喵去，仲要睇實大陸同東南亞嘅 agent！

呀呀呀呀呀呀呀呀 。 。 。！！！！！！！！

收工嗱，未做晒都走啦 (根本就冇時間做嘢！)，晏都未食呀！！

(號外 : 衰 S 今日喺老細房大吵大鬧喊添呀，癲婆咁？！)

講佢有排講，再講啦，攰呀！


昭然

飛虎熱

近日，彷彿，見到昭然老豆 。 。 。

當年，無論幾點乜天氣，昭然老豆睇完 call 機就要即刻換衫，孤伶伶攞住袋嘢出門！

後嚟有日，昭然同老豆一齊睇周潤發啲重播戲，昭然問飛虎隊真係咁㗎？

老豆話啲戲假㗎！

老豆同昭然講，嗰兩年，佢係飛虎隊成員！

據老豆講嘅，昭然都幻想到飛虎隊一落場就 in charge 晒，做嘢時有幾型！

老豆話，飛虎隊一落場就要用最短時間做完嘢; 總之，就隱秘到場、 極速完事、 再鬼祟離場！

老豆仲話，戴咗頭套一落車就唔講嘢㗎嗱，怕俾人認出囉！

飛虎隊要求極高，搵親嘅隊員唔 fit 唔 smart 都唔搵！

後嚟，昭然老豆轉咗做國際刑警 。 。 。

昭然老豆，初出學堂做咗幾年卧底，繼而藍帽子，後嚟又飛虎又國際刑警，仲要捉 I.I.、管難民營，過世前仲做埋教官…

問佢最鍾意做乜？

佢話，水警！

型、 英、 勇，俗人睇到嘅永遠都係表面嘢？！

老豆時時教昭然，真正叻嘅人，做咗都唔俾人知！

昭然向，為從前嘅真香港，賣過命嘅老差骨 - SALUTE！


昭然

五二七 。 。 。

第三個五月廿七，回流返香港三年嗱？！

如果，如果，如果再下一次轉大運又係咁顛簸大破財嘅話; 菩薩，that's enough I quit the game！！！

呢三年，一如前半生，苦喺邊只有自己知冇人知！縱使，身心俱疲依然殘喘人世，命呀！！

好嗱，做完古人望天哀嘆兩嘢，就講返昭然份工嘞！

隱秘公司呢份工，由四月一開始返未做夠一個星期，其實已辭過一次職，但走唔甩！

五二六諗住遞信辭第二次職，點知嗰日忙到呢！

五二七夾準衰 S 去廁所，昭然即刻攝入老闆娘房… 遞咗！

當日下晝，當然入房傾啦！講完衰 S，我見我搞得氣氛幾好，順勢連笑帶打過老闆娘一棟; 咩呀，話佢叫昭然 be smart 囉！

老闆娘話佢好難做 blah blah blah，話就要話晒咁多個 blah blah blah…

但係妳望住昭然講喎，昭然幾咁冤枉呀都唔關我事 blah blah blah，昭然做咗咁多年嘢都冇老細話過我唔醒嘅 blah blah blah…

好，轉入正題。

入房，除咗留昭然仲要升昭然，升昭然睇住個 Department！

(嗱，都話我去到邊，升職加人工都好快㗎啦！)

失禮'將來'昭然管治嘅'Department'就只有我同'佢'嘅唧！喺中小企嚟講都叫'Department'啩，昭然未做過中小企唔識呀！

做咗兩個月唔夠，升我職？！昭然呢啲務實人梗係唔肯升，未學晒嘢邊有人服！又可能，昭然好快又辭第三次職呢？！

五二七夜晚，老闆娘實會 pillow talk 㗎啦; 五二八一早，昭然、衰 S 同我而家嘅臨時大佬又一字排開喺老細房嘞！

衰 S 真係蠢，老細嘢嘢話緊佢幫緊我都唔識聽？！

老細臨尾寸昭然，話我學是非！昭然同老細即時互望笑，心撚照！

嘩，點忍呀？！日日俾衰 S 指口篤鼻話昭然老、乜年代，仲拋嘢過嚟叫我俾邊個邊個，唔教我嘢又跣我，佢嘅嘢唔做點我做… 講佢嘅惡行有排講呀！

五二八下晝開始，昭然同衰 S 嘅工作互調; 係昭然要求嘅，我要盡快識晒'Department'嘅各項細節。

五三零朝，同衰 S 開火…

佢好撚專制，每日都管住昭然幾點放工！一早返去，佢劈頭第一句就嗌 '妳噚晚做乜咁夜走呀？妳噚日冇乜嘢做個喎！…'

(昭然八點幾收工冇 ot 錢，要八點九後先當 ot 㗎，算爆呢！)

昭然冇啋佢，佢仲繼續講講講 '唔明妳做嘢咁慢…' (嘩，呢句影響昭然 performance 喎！)

'喂，我而家幾點收工到唔到妳管呀？我留喺度唔一定做唔晒嘢至留低，係咪要妳批吖？'

衰 S 呆咗，語調即時細晒 '我八卦吓啫…'

昭然仲整多句 '妳仲犀利過老闆娘呀！'

點解衰 S 呆咗？因為昭然一直都忍佢，昭然唔
出聲個囉！昭然突然大聲反擊，唔嚇撚死佢呀？

點解反擊？五二七，老闆娘叫昭然唔駛忍，做佢㗎嘛！

衰 S 當然唔甘心，個零鐘頭後又嚟！

昭然唔係問佢嘢，我隨口講工作上嘅嘢 (自言自語嗰種)，佢借機又話昭然唔識 blah blah blah，又話佢好忙唔答得咁多…

'我唔係問妳，冇叫妳答喎，妳講咁多做乜唧？'

激死佢，昭然起身去洗手間佢就小小家家喺度大力 pluck 嘢？！？！？！ who's care！！！！！！

五三零食晏後，衰 S 被叫入老闆娘房，出嚟話昭然知由五一起扣佢津貼 (好似有勤工獎同飯錢啩，唔知我有冇呢啲津貼，總之而家我未有所以唔知呀！)！

再晏啲，衰 S 又做錯嘢呢！激到老細呢！

臨收工，老闆娘話五二七未講完; 由五一起，話咁快一個月就俾昭然過試用期並加一千大圓，加咁少昭然梗唔滿意！昭然呢啲'率直人'乜都擺上塊豬青，佢見昭然唔滿意就後補一句，話做得老細滿意，唔駛到 year end 都會再加人工兼分紅喎！ (okay, fair enough！)

(隱秘公司奸奸狗狗，加昭然一千，都唔知係咪冇其它津貼嘅啫？！)

兩個月唔夠，又要全面學過晒啲新嘢，盡快上手睇住個 'Department'？！

唉，昭然真係辛苦命呀？！

今朝，六點十已煲落罉黃耳健脾湯，等嫲起身，兩嫲孫養吓顏先。

各位，天氣既濕且熱，要多飲暖水同湯水、 多菜少肉宜清淡呀，珍重啊！


昭然

劫後餘生 。 。 。

2014 • 5 • 25 • 1720 - 1735

晴朗 • 炎熱

深圳東門 • 地面

好日唔北上嘅昭然同經常北上半條腸出嘅細妹，一齊經歷事件！

忽然，街上人群亂跑！兩姊妹一齊跑！！

昭然諗起倫敦快閉黨，妹以為玩！

唔夠兩秒，兩姊妹所有諗頭都知唔係; 因為，從亂跑人群表情睇就知唔係玩！

人群帶住極驚恐表情四面亂跑、店舖即時落閘、路上兩旁貨品散地、巴士唔肯開門、部份人群搶的士 。 。 。

再從人群表情睇，昭然諗起台灣地鐵癲男事件！

兩姊妹拖住跑，繼而十指緊扣拖住喪跑 。 。 。

好驚、好驚、真係好驚！！！！！！！！

好似有好多把刀要擘落嚟咁！！！！！

搶唔到車嘅人群就跑到對面街，總之見路就跑！！！！

突然，見到一架有兩條友嘅公安車同一架鐵馬 。 。 。

兩姊妹見車開門就上！

妹手震住通知相熟店員閂閘，昭然手震住協助年輕夫婦加手推 bb 車喺中門上車 (大家都驚到手震震，而家諗起好好笑！)！

昭然手震住，自拍咗張相再同乘客傾計，佢話前一個站已見人亂跑！

妹叫昭然失散咗各自過關再電聯，乘客話係呀最緊要先過關！

今日呢單嘢，可能係驚弓鳥！但我知，一定唔會喺新聞報導知道實情，共匪嘢有邊個知吖？！(噢，新聞台報導，有一傻佬推跌店舖貨架喎？！)

點都好，各位，喺香港或北上做嘢、娛樂或者喺街行，請打萬分注意、安中帶危呀！

慶幸，昭然仲保得住條命返嚟煮飯俾嫲食！(喪跑都可以受傷㗎，唔一定返到嚟㗎！)

昭然笑中帶淚望住妹講 : '似唔似我哋細個時，我拖住妳避難呀？' (佢老母同我哋老豆經常打交，四歲多啲嘅昭然一見唔對路就拖住一歲多啲嘅佢哩喺地主公公枱低避難)！

妹亦望住昭然笑中帶淚，對望後發現，兩姊妹毛管依然戙起？！？！？！？！

兩姊妹見人跑我哋又跑，唔知精定笨？！

總之，嗰刻，能第一時間逃離現場，最為緊！

好彩，昭然好早好早已經立好遺囑俾嫲，昭然死咗嫲都有錢安老，只係冇昭然陪佢飲茶、同佢抹地、俾佢出氣， 同煲湯煮飯俾佢咁好營養啫！


昭然

Be Smart！

秒秒多事幹發生嘅隱秘公司，噚日又嘈喧把閉嘞！！！！！！

昭然，無端端，被成為主角？！？！？！

禮拜四，昭然手上其中一大大大大大客打嚟問嘢，問到關於逃稅專門嘢; 好彩昭然平生去到邊都習慣耳聽八方，上月我聽過斜對面坐房人用英文答過呢樣嘢，所以前日兩次電話咨詢，我識吹番半個鐘頂得住！

禮拜五，昭然手上喺澳門嘅其中一大大大大大客，同佢半日喵咗十幾次，個個喵我都即時覆表現誠懇做到嘢！最後，張單即日提升多四倍錢！

搞事怪之一老闆娘，經常知啲唔知啲、見到啲又以為知晒嘅佢，又喺時候出動參與落結論嘞！

噚日臨收工，一嘢叫咗五人入房包括衰 S。 插完佢條再插我，佢望住我講，叫昭然做嘢要 be smart！

佢話，香港大客問嗰啲都唔係嗰單 job？！

佢話，澳門大客加 sub-user 唔係我話加就加？！

(香港大客講明，問昭然料後再同佢大老細、全部門嘅人，開會商量做唔做呢單嘢，咁梗係唔係嗰單 job 啦！傻閪！)

(澳門大客講明，呢單機密特急嘢要佢自己親自收，經佢秘書都唔得！咁唔加，係咪趕佢走唔做生意呢？亞懵閪！)

懵閪一路望實昭然，喺咁多人面前叫昭然 be smart be smart 咗好幾次！昭然冇講一粒字，只係一路望實懵閪笑笑口點頭！

昭然打工嘅可以講乜？妳話昭然係乜就係乜㗎啦！妳覺得昭然柒，柒人睇到嘅都係柒碌嚟！柒鬥柒，講乜撚嘢？！

喺隱秘公司，暫時我只服我老細; 佢同昭然一樣要求極高嘅人，有我老細讚過我已經夠。

昭然啱啱入職，佢叫我同衰 S 入房; 話睇過我覆客啲喵，係咁覆㗎嘞覆得唔錯，叫我盡快學用行頭字眼就得嘞！

昭然老細啲英文好好，好到好似鬼佬咁，唔係一般香港人嗰啲所謂 '英文'！英文台成日訪問我老細，佢去全世界代表香港行頭開會添！

(俾曾經批評昭然嘅光頭龜知道，就好嚕！光頭龜話唔知我啲英文寫乜㗎？！

梗係啦，連喺鬼域大嘅人都話昭然啲英文似鬼佬，你梗係唔識睇啦！昭然啲英文俾英文人睇㗎嘛！ \^o^/ )

仲有，做咗十幾年嘅保皇黨副經理，前兩晚臨收工行過昭然位，讚我 okay keep going！

喺隱秘公司咁短時間，連受兩讚，係昭然預料之內！

梗係！

昭然，去到邊埋乜位，永遠永遠都係升職最快、 加人工最多嗰個！更有老細誇昭然係億裡挑一呢！

而家，居然俾個懵閪當衆叫昭然 be smart？

呢個幾月，忍衰 S、 食死貓昭然都冇大呻過，但呢啖氣點都吞唔落！

俾懵閪拆昭然招牌喎而家，點忍呀？

人，唔需要叻靚醒，好命就得又一例證！

禮拜一，我會，辭職！

每日，出咗公司架，昭然就覺得自己係風車國長壽節目 Big Brother 裡面，其中一個 housemate！

點解？

周圍收音 cam，仲唔係 true man show？淨係昭然頭頂都兩支收音 mic 啦，電話、 電腦全監控唔在講！

我哋唔可以同外界接觸，有人㩒鐘都唔理，電話響要盤清楚至答得！

有日，有條新仔唔識死玩自拍，即時有人彈出嚟叫佢 delete，食完晏就唔見咗條新仔嚕！

公司好靜，靜過圖書館 (我上去見工時，第一個感覺！)！

表面靜，實際唔靜，因為 Skype 好忙！老細 Skype 一到，全部打工仔喺四方八面即起身向住同一方向行？！有次喺路口遇到我頂頭經理，兩個邊行邊打眼色，大致係問衰乜嘢？佢答唔撚知咁！

呢種場口一日發生好幾次！次次我都覺得好型，好似無間度第一輯劉華同家棟一齊行咁型！

經常鬧插哦，咪一個月走四件囉！坐緊喺度嗰啲，個個都諗住走㗎！

仲有，衰 S 喺呢個半月不停話我老，不停經常標榜佢係九十後？！上月，有日做緊嘢，佢問我有冇四十歲？我想答佢唔只，跟住佢自答 : '不過妳個樣又唔似！'

四十？？？

從來冇人估昭然四十咁老㗎，四十！

衰 S 成日住我同其他同事嘅往來，只要有人嚟同我講嘢，佢必定插口搭嗲跟住就踩我老㗎嘞？！

衰 S 仲話我同啲離職同事交換電話，有乜企圖？(係人哋八十後主動俾，唔通我唔要咩？)

衰 S 成日自行夾硬打埋我張咭仲'等'我一齊走，務求唔俾我獨自做嘢？！

衰 S 仲經常點我做嘢！無端端拋啲文件過嚟 : '同我俾邊個邊個'？！

五月廿一號前我都有同佢俾邊個邊個，因為工作上我真係要靠佢！

廿二號嗰日佢又係咁，我望住衰 S 同佢講 : '我唔係妳 oa 呀，兩步路自己行啦！'

'妳過開去同我拎埋順手…'

'唔順手喎，我唔到妳點喎！'

衰 S 經常跣我，叫我咁咁咁覆客，轉頭老細見到問我點解咁樣覆，同時衰 S 就用佢名再覆扮好人？！

衰 S 秒秒住我，叫我唔好理啲客，咪啲客就乜都打上嚟… 有同事經過，佢又長篇大論講我點點點答個客？！

個客只係問喺 website 印唔到嘢，我試完教客就話我柒嘞？！衰 S 大大聲話我 : '唔識叫客用 print screen 㗎，妳以前個年代呀？'？！

個客喺電話度講我知試過用 print screen 啦，我又忍！

衰 S 經常話佢做得快，唔明點解我做唔完！梗係，學妳哋九十後乜都唔答唔覆唔睇清楚，梗係快㗎！

我睇佢哋以前啲喵掘雷搥、 冇前冇後，笑死我！仲講文法？客套語都未識用！文法！

衰 S 好賤，我出完喵佢會加句 : '嘩，妳啲英文真係…' (繼而，冷笑住行開 。 。 。 )

但，英文人打嚟，佢講唔掂就隊個電話嚟叫昭然聽 : '妳英文好呀，妳幫我吖！'

昭然啋鳩佢啦，梗係！都精神分裂嘅？！

隱秘公司，除咗係五日工同暫時俾到收入我之外，真係冇乜嘢令我想留低！原本，計劃捱到年頭整靚個 resume 同儲個錢喺手…

呀，解籤哥哥叫昭然端午後可以搵工，而家早咗一星期啫！

可能轉 plan 呢，變賣家當咪唔駛做囉，香港啲人工又唔係多！仲要咁受氣？！駛晒咪攞 benefits 囉，咁就至 smart 嘞！


昭然

無恥！！！ ╰_╯

前兩星期發生咗啲事，令昭然對人呢種生物感到徹底失望！

唔係工作上啦，打工仔低三下四小把戲未見識過咩！勢利八婆親戚嘛？昭然當佢透明啦！共匪愚民嘛？天會收啦！

係嫲對面屋嗰個獨居老人 S，係昭然回流前幾年佢至搬入嘅; 一直相安無事有傾有講，佢亦幫嫲買吓嘢，嫲亦請佢食吓嘢。 昭然煲湯就俾碗佢飲，炆豬手、蒸海蝦又俾啲佢食。

直至，前兩個星期，昭然發現佢成日企喺佢門口望住我門口，我見到佢問佢做乜企喺度佢又答唔出？！仲搬張籐椅對正我屋添？！

當晚，俾昭然發現佢出埋佢門口企正正喺我門口偷睇我 。 。 。

夠啦！自細，昭然對人人都好，但人人就只會蝦昭然？！？！？！

我對佢好，平日見面寒暄問候係出於禮貌，係對人嘅關心，啲狗公係要諗埋一邊嘅？！

呢個禮拜返嫲度，噚日佢聽到昭然開門開心到即時彈起同我打招呼，我背住佢冇啋佢！

頭先返嚟喺樓下口又遇到佢，佢叫嫲同我，我即刻推埋嫲走去扮睇信箱唔同佢一架，我聽到佢話我借咗聾耳陳隻耳添！

哈，啲賤精係咪覺得自己嘅行為係人嘅合常理所為呢？

天呀，咪再考驗昭然啦！好撚嘔心呀！無論昭然幾老，心靈都係女仔嚟㗎咋，昭然會唔開心㗎！唔通做雞嘅，就好甘心情願俾人夾硬強姦咩？！

馮師傅話昭然個人太善，會俾人蝦好蝕低！

善，原來係錯嘅？

地球，對昭然呢種善良嘅外星生物，實在，過於，危險！！！


昭然


頭先，嫲想開門透氣，我唔俾！

嫲話 : 係呀，鹹濕佬！ ╰_╯

生活 。。。

噚日好忙呀！(昭然有邊時得閒吖？！？！？！) 😰

一早同嫲去飲茶、坐公園、買啲餸、推嫲返屋企，急急腳又趕去箍牙覆診！

診完，企叮叮去買麵包; 嘩，梳嗰 thankful week day 2，啲人好似趕去投胎咁？！

喺正門入，見到保安即刻問最快點去超市，昭然得閒同你班傻嘢迫嗱！嫲孫只愛 DONQ 麵包，冇計！

又企地鐵返中環，買燒鵝、雲吞、庶汁、庶汁糕，舒舒服服坐巴士返嫲度趕煮飯！

今朝 0632，湯已煲落、廚房已洗抹乾淨嚕，地都抹埋嚕 (禮拜五收工返嚟抹咗地㗎啦，瀨尿嫲死硬頸唔著尿褲，咪又要再抹囉！嫌我閒逸得滯肥咗啲啩，加我工減吓磅囉！)，唞陣又出動飲茶、坐公園、買 weekly 餸啦，功夫邊有得完吖！

唞陣先，聽日又要去賺錢養兩頭家呀！


昭然


後話

頭先嫲清潔完佢自己，出嚟坐喺昭然床邊望住我！昭然扮嬲繆佢仲用背脊 dut 住嫲，嫲叫我唔好嬲，佢知佢陀累昭然，唔好意思…

昭然話著尿褲就唔嬲啦，嫌我做未死咁？！

點知，嫲仲嘻皮笑臉睜大眼話佢慳咗兩條嘅錢！我話錢搵嚟駛，慳得到咩？！

水費唔駛錢咩？捱壞昭然唔駛錢醫咩？啲人都唔知點諗嘢嘅？！？！？！

到底，昭然係咪要表揚嫲為我慳咗廿蚊呢？！？！

世事對錯，真難辯、不好纏！

一人前

唔駛 ot 真好，可以行街、一人前！

收工，攞四對新鞋再去 SOGO 買嘢食; 點知，昭然，人就大大份嘞，但敵唔過左一個五呎唔夠嘅亞豬媽，右一個爛靚綠爪 OL，兩條友夾住昭然搶 sushi？！

食嘢啫，妳兩個唔駛咁癲咁冇禮儀嘅！


唉，衆 生 相、皆 為 醜！

華 衣 難 掩 癲 狂 態！！


昭然性格唔鍾意搶、 爭、 鬥、 霸、 呃、 貪; 自細，嫲已經話我執書好鬼笨，仲蠢加鈍添 (噢，昭然真係咁差咩？！)！

蠢就蠢啦，蠢到昭然咁醒，識賺咁多錢同妳去福記大富貴、 豪裝間屋，咁又唔怕生多幾件死蠢呀！

搶唔贏，就行去食好啲，話晒戒口戒咗年幾兩年，第一餐食魚生就食好啲啲！

聽晚收工，又要返嫲度做妹仔啦！唉，靚女嚟㗎嘛… 真嘥料！

唔想再一人前嗱！到底，你喺邊呀？！喂喂。 。 。


昭然

人工包埋！

第二次，參與隱秘公司嘅每月全體大會…

今日，Chairman gut 坐喺長枱另一邊嘅昭然！

佢 gut 昭然 ot，要睇緊時間做嘢！

我即時 gut 返佢，昭然部腦勁慢又經常 hang 機，一日入幾次房哦哦哦，請問點做嘢？！原本，我今晚都唔駛 ot 㗎，see，邊個害我吖？

當時，老闆娘第一時間 WOW 咗出嚟等戲睇，其他人兩頭擰睇 debate！

衰 S 幫口做證一日 hang 幾次機; 梗係，gut 完昭然實 gut 佢吖嘛！

結果，先 gut 人者…… 輸！

老細有次炳另一 team，話打工仔唔好諗住準時收工，唔做掂唔走得！

都黐黐哋，打工仔有一半以上計劃做到出年年頭就鬆人，仲喺度玩我哋？！睇餸食飯啦，我月袋你哋幾皮英鎊呀？港紙咋！

•

•

•

話咗呢啖飯唔易賺嚟食…

呢個星期，大老細喺澳洲嚟咗巡視業務; 大老細，昭然至憎聽澳洲英文唔好再同我講嘢啦，我喺鬼域一見到澳洲節目就即轉台㗎嗱！

仲有，我哋開會全程 in English version！


昭然

禮拜六，好節目？！

禮拜六晨咁早，昭然就出動保養貓樣嘞 ^^

我唔會只顧自己享受，而冇嫲份嘅 (昭然係乖孫嚟㗎嘛 ∩__∩y )！

貓樣保養過後，訂咗兩對見人 high heels，立即去買富貴餸俾嫲食 。 。 。

今晚㗎仔宴，食日本大根炆油甘魚頭，仲有日本國第二暢銷嘅佐賀 A3 和牛啊！神戶牛柳排第四㗎咋！

糧都未出，真嘅昭然就返咗嚟嚕？！ ^3^

唔緊要啦，冇錢駛咪賣樓囉，食晒咪瞓街扮可憐等政府養囉！最緊要我做得出啫，咪穿昭然煲呀！滅口㗎！

•

•

•

歸家途中，突然感覺到唔只嫲等緊昭然，仲有撻地同廚房啲煲煲碟碟，同樣等昭然返去同佢哋清潔呢？！

唉，我嘅王子，你幾時救昭然出生天呀？昭然等咗你幾十年嗱，等咁耐都冇個拖得上手、擺得入口嘅？！

冇天理，靚女冇人要，醜女就俾人當寶？！？！？！？！

&%~*#@£△$☆


昭然

今日返工 。 。 。

受咗寃屈氣！

最無謂嘅係，嗰個只係其中一個坐房男而唔係老細，而佢眼中錯嘅嘢都唔係我錯，呢隻貓食到昭然想嘔！

衰 S 不停並經常煽風點火，叫昭然同人開火，我梗係啋佢都戇啦！

衰 S 仲叫昭然練吓啲 eq 添？！

吓？！秒秒對住妳，我 eq 仲叫低呀？！

觀音菩薩呀、觀音菩薩！

昭然唔係冇工揀嚟做㗎，當初都有另一份搵少啲錢，但昭然鍾意嘅工請我，係袮老人家堅持一定一定要我做呢份？！昭然聽袮話，袮咪跣我至得㗎，份工好撚惡哽呀！

袮嘅一定一定，係咪一定一定有安排㗎？唔係嘅，我唔忍即刻發佢圍㗎！

為咗呢份工，昭然今晚第一次忍唔住喊咗啲啲 。 。 。

只因為喺地鐵車廂入面唔方便喊啫！

未入地鐵前，嫲剛好打俾昭然問我加完班未？叫昭然記住食嘢！

嗰刻，昭然有啲憎嫲！因為，如果唔係為咗佢，昭然就唔駛返嚟咁受氣但又搵唔到錢！

只係嗰刻，嗰刻嘅下一秒已經冇憎！

因為，一切，皆我命！


昭然

晨昏鳥

今日晨早鳥，八點唔夠坐定定開工啦 (昭然份九、六工嚟㗎，但噚晚十點九至收工)！

今晚順利準時過啲啲收工，因為今日只入老細房同 Partner 房各一次唧， PHEW~~

嘩，朝早嗰寧靜一粒鐘唔講得笑，果然湊效！

昭然呢間隱秘公司要求真高，唔掂即刻起身冇得賴死！

噚日朝開工冇耐，有個同昭然同一日入職嘅男同事，被兩人夾住去打咭，提早收工兼以後唔駛返 。 。 。

今朝，又有個遲昭然兩日入職嘅女同事自動消失咗 。 。 。

衰 S 話昭然捱得，話我個位三煞位唔係普通人坐到！

其實，我覺得老細就住我嚟教，今日俾佢發現啲嘢 (我冇錯，只係佢太心急，我未做到啫！)，佢仲安慰我話唔緊要我仲新！老細仲話衰 S，叫佢咪再俾嘢我做，如果唔係我個頭會大，叫佢有乜俾我前同佢講聲先，佢會安排喎！

唏，昭然要加倍睜大眼睇清楚咪做錯激老細，我要好好報答佢兩公婆俾飯兩嫲孫食呢！

今晚，買咗王家沙上海嘢兩餸一飯加甜品俾嫲食，開心、 感恩！！


昭然

五姨婆

瀨尿嫲第五個妹，亦係嫲咁多親人當中，昭然會自願地同佢來往嘅唯一一個; 嫲唔係太鍾意呢個妹，話佢腳頭唔好剩係好佢自己兼孤寒。

唉！人，經多次轉世均染上不良心性，演變成千億萬萬異態惡性！喺昭然眼中唔害損別人、唔屈枉別人、唔造謠生事、唔大話連篇、唔強詞奪理、唔扭橫折曲、唔貪人錢財、唔鵪鶉唔鴕鳥，我都會同呢啲物種講兩句嘢嘅！(係呀，昭然對人事物嘅要求極高㗎！)

五姨婆喺農曆年時入院兩月！昭然忙工作為搵食，延至噚日去探佢 (但我時時有打電話同佢傾計㗎！)。 嫲隻嘢，喺五姨婆入院期間成日叫我打去問情況，知道姨婆仲喺醫院，嫲就眼濕濕好擔心咁！

嫲心腸好硬，每次昭然出機場返鬼域，只有我由屋企門口喊到上機！嫲呢，佢對眼濕都唔濕吓？！等上機，打返屋企問佢，佢仲話佢自己好堅強唔易喊添？！既然我可以咁狠心掉抵佢，佢做乜喊喎？！

呢，過埠賣豬仔捱騾仔啦，仲要激多昭然一嘢呀？！

噚日，嫲好開心啦，兩姊妹私下傾咗個幾鐘，又見埋佢心目中嘅好姪 K1 (昭然自少就唔鍾意 K1，佢衰貪心同孤寒囉！)。

兩個老女人碰面就怨天怨地話做人好悶煩、攰夾冇癮…

昭然話做人就係苦中得著，天安排妳住世唔係享樂㗎！講到咁玄，似明非明？！換嚟，佢讚昭然叻識咁諗嘢！又讚我本事，一個人樣樣嘢做到咁足咁週到！

嘻嘻嘻… 昭然唔知醜㗎，咁我確係抵讚吖嘛！嘻嘻嘻…

呀，三個女人行去食晚飯時，我話我哋加埋二百幾歲！

94 + 89 + 唔講得 (班老同學會斬昭然的呢！)

哈哈哈哈哈哈哈哈… 人啊？！？！


後話 :

五姨婆後生時幾靚女㗎，打日本仔時有個㗎仔軍官日日攞大桶牛奶同食物接濟佢哋㗎！


昭然

半個月 。 。 。

頭半個月，昭然喺隱秘公司已 OT 咗廿幾個鐘嘞！

七、 八號嗰日半，由於衰 S 對昭然實在太冇禮貌又晦氣咁所謂教我嘢，仲發脾氣講粗口？！樣樣都話講一次就唔講，我實際做時，問啲佢講漏嘅嘢又乘機大大聲話我嚟顯示我無能！仲成日大大聲話我做漏嘢，其實係佢冇經驗睇錯咗！！

佢咁叻就佢自己做埋昭然嗰份啦，我咁老都唔阻住地球轉嘞！八號晚同老闆娘講辭職，入到房，老闆娘問，昭然就如實作答啦，係咁易篤衰 S 啲啲衰嘢出嚟 。 。 。

結果，第二朝，老闆娘特登搵個 Partner 同我講咗好耐好耐嚟留我，美言難卻昭然梗係走唔甩繼續喺度奮鬥啦！而衰 S 呢，就俾老闆娘訓示到頭耷耷、馴晒囉！

嗯，昭然喺房出面一大班人面前忍妳，喺房入面同最高層至做妳; 唔駛多，一句唧，一句就做到妳而家對昭然禮貌周周！

妹，妳口口聲聲經常掛嘴邊都話昭然老啦 (衰 S 真係指手篤鼻話昭然老㗎，經常話佢自己係九十後！)？！昭然既然老嘞，經歷固然唔少啦，仲超出昭然實際年齡好多好多倍添！想反我、玩我？妳儲埋前世、下世嘅功夫仔都未夠班呀！妳未夠班我都費事出手放生妳，點知係妳找死？！昭然一係唔出手，迫到我出手妳就唔會有命囉！

我，昭然，出名毒兼狠，妳當我過去嘅經歷流㗎？！昭然喺鬼域有朶㗎 - 六英里範圍內都知昭然係 Horrible Woman 㗎！

繼續奮鬥過後，人工未出就先贈兩大隻黑眼圈喺面上加以鼓勵士氣？！又因為長期坐，對腳腫到自己都唔認得？！睇怕，要快啲游返水至得嘞！

隱秘公司都好經典㗎！每日，各 team 可以被叫入老細房好多好多次、入 conference room 好多好多次開好多好多次 short meeting、又有好多好多高層同我講嘢？！

終有一日，昭然會大嗌一聲然後叫佢哋停一停！因為，我想好好好好咁做好我手頭嘅嘢、好好好好咁覆吓客嘅喵、好好好好咁跟吓 Overseas 嘅客！

返咗半個月工，都冇機會抹過我張枱，我想好好好好咁抹吓嘢，得唔得？因為，昭然有潔癖㗎！

噚晚奮鬥到十一點九然後放四日假，要好好好好咁陪吓嫲同整理下隱秘公司嘅筆記盡快全部記入腦，仲要好好好好咁休息吓！禮拜二，昭然想早一個鐘返公司收喵 (每日，至少收一百個喵，額外兩日假唔知有幾多呢？！)，事關有啲國家冇假放㗎嘛！

祝，假期愉悅！


昭然

媽娘誕

食皇家飯大嘅昭然，自少同關帝爺爺、 媽娘就好熟絡。

零幾年，昭然仲喺鬼域捱騾仔！同嫲閒話家常時，佢講我知佢鄉下間天后廟祝融燒晒乜都冇…

嫲話，因為係廟祝冇照理好啲油燈就返歸，所以咁囉！

(嫲邊話廟祝真衰冇交帶，邊咔咔咔係咁笑，嫲話好好笑喎？！)

我話 : "媽娘想換屋啫，簽啲錢俾媽娘起過間屋啦！"

(記憶中，三十年內第二次起過間廟㗎嗱？！首次好似係冧廟、 其次就火燒，真多災難？！)

嫲聽見昭然話簽錢，好雀躍 : "吓，我哋都簽呀？簽幾多錢呀？"

"簽兩萬啦，有冇錢喺企？落妳名好啦！"

"兩萬咁多？一萬夠啦！" (真孤寒！)

•

•

•

戲肉嚟嘞…

零九年嫲九十壽辰，昭然除咗安排福記豪宴俾嫲威，仲安排咗順德鄉下之行俾嫲添。

去到題名榜前，見到嫲同我名排第二！

(昭然唔係出風頭，排第二係有段古㗎，睇落去！)

返到酒店嫲講呢段古我知…

嫲其中一個姪仔 K2 曾經係鄉下首富，集資建廟時佢已債台高築; 但為咗保住自己過氣首富嘅面子，多簽幾千蚊零二百，目的喺題名榜上排我前面？！

(K2 原本簽幾多我哋點知？佢大佬 K1 講過嫲知個囉！話 K2 問人借都要贏我？！？！)

諗返，榜上乜乜乜捐款一萬零二百圓正，好好笑囉！我笑佢核突囉！！

臨離開，嫲叫我俾多啲錢 K2 買嘢食; 當我俾二千共匪錢佢時，佢嘅眼神表情話我知，佢內心難過嘅仲唔好意思望我添！

以前未有自由行唔容易落嚟香港，但 K2 落親嚟傾生意都俾美金亞嫲買嘢食！嫲好開心㗎，開心唔係啲美金 (嫲自己都搵好多大錢，駛鬼貪心人哋啲錢咩！)，嫲開心自己大佬生個仔咁叻啫！

首富變債仔，仲爭乜鬼面子吖？！

人，真心做事有神知，假情做人俾神罰㗎！

目下，裝假、 情虛、 偽善多的是！仲唔改？枉稱人！


昭然

難過！

收工嗱！！！

朝早同嫲覆診，晏晝返半日，開會、跟嘢、俾客煩…

攰！！！！！

聽朝，昭然要早過九點到公司，做埋今日嘅手尾！！

晏晝擺低嫲昭然仆返工，閂門時聽到嫲發出哀號 。 。 。

"難為妳呀，孫女！撲嚟撲去都係為咗我…！ 呀，我個心好難過呀！"

我趕時間 (實際已經遲到！) 冇理嫲，奪門就跑嘞！

我忙、我攰，都要記低嫲呢段悲鳴！

昭然，比嫲更難過呀！！！！！！！


昭然

我係亞積？！

俾兩份工玩到陀陀擰，半個月有多冇煮飯、煲湯嗱！對唔鍾意食街外垃圾嘅昭然，被迫食半個幾月味精、雞粉、梳打粉、鬆肉粉、千年凍肉、啤水肉，實在係慘無人道呀！

今晚冇煮飯，滾咗大扎莧菜、羊肉片湯頂吓癮先，聽朝晨早起身煲袪濕壯腰湯。

今日昭然身體狀態係近大半年最好嘅一日，所以抹咗嫲屋三個月冇抹嘅地、同嫲去剪咗頭髮、幫嫲洗頭捽老泥…

唔好以為昭然好污糟，其實我有潔癖至真！忍到唔抹地，因為昭然腰椎痛囉，全身肌肉扯到行晒囉！吽到生蝨都係咁話，病壞實在冇本事彎腰捉蝨呀！

昭然狀態真係超好，忽然記得我至愛甩毛影帝有戲喺明珠台做！睇我至愛嘅男人先！

•

•

•

嫲剛叫昭然著返條褲同早啲瞓，聽朝早啲起身做嘢喎 (⊙o⊙)？！我掘住佢，佢咔咔笑？！ 佢話我今朝都一早起身洗廚房，聽朝要煲湯咪要早瞓囉，仲話昭然好緊張煲湯添？！(係呀，唔俾飯我食唔會死，但冇湯俾我飲會即時死到直一直㗎！)

呀 ) ) ) ) ) 黑奴生涯呀？！

慘~絕~人~寰~呀 ) ) ) ) ) )


昭然

更隱秘 。 。 。

四月四號，第四日喺隱秘公司返工！

繼經典公司內裝三百幾支鏡頭，外街角落鏡頭處處，電腦記錄行人路線外，而家嘅隱秘公司亦不遜色！

隱秘公司規模比經典公司細好多好多 (經典公司係世界一，點比？！)，但係，隱秘公司裝嘅鏡頭亦唔少，都係冇隱私？！

昭然組有大佬同衰 S。

第一日返工，朝早，老細已叫兩人入房訓話兩次！第三次，晏晝有昭然份，同另一組經理共四人入房訓話！

四人入內一字排開老細枱前，三人雙手放後，一人雙手擺前 (咁突出嘅，咪係昭然囉 ^^ )！

老細 : 點解呢度咁咁咁…？Z，你唔係第一次錯個囉喎，一次兩次三次我忍得，第四次我會嬲個喎！行家俾料你，你要即刻話俾其他人知㗎嗱，你收緊專家價錢，連客都知你唔知就拜拜㗎嗱！你做嘢咁 lup，我學你咁 lup 六月出三月嘅糧得唔得呀？唔好再錯嗱，我驚我唔覺意俾兩個禮拜你呀！明唔明呀？

嗰刻，昭然第一次見香港嘅大老細！

第二日返工，同第一日一樣 。 。 。 做填鴨！填完嘔嘔完再填，足九個鐘！

第三日返工，有行家上嚟開會，大佬叫反轉所有有字嘅嘢、熄 mon！ (我有大把急嘢要做呀，大佬！)

同樣第三日，衰 S 喺大佬面前 dut 昭然，叫我寫低大佬講過嘅嘢 (我有吖！)！昭然 dut 返佢，咁多嘢點寫呀？寫低又有時間睇咩？樣樣都話急，樣樣都話要即刻覆、即刻出，瑣碎嘢又多郁啲都錯…！

又係第三日，請七號半朝假同嫲覆診，見我嗰個女 Director (老闆娘) 即叫昭然入房？！ (我識撈嘅，要搵工都辭咗工至見工嘅！)！

第四日返工，我大佬 last day！

係呀，冇花冇假辭工走㗎！仲話為咗等昭然返工，佢留多一個禮拜添㗎嗱！

咁，半個月前就唔應該請昭然啦！

頭兩日速成班，攰到昭然出唔到聲，晚晚十點唔夠已瞓著！噚晚、今晚失眠，諗緊啲嘢點跟，呢個客要點服侍、 嗰個客又點順摸…！

喺隱秘公司打工嘅 (眼見) 大概有十二個，但有八個係新人？！耐嘅四個月 (衰 S)，新嘅兩日？！日日不停見人！問衰 S 係咪見親都請？佢話啱啱相反！ (呢點，解籤哥哥冇呃昭然！)

解籤哥哥話一年唔駛有位上，咁睇應該係囉！

解籤哥哥叫昭然一定要埋堆要一齊食晏，頭兩日我有呀！但係… 貴得太離普囉！

48 至 65 蚊個餐，再貴都有？！

晏晝昭然食素，鮮茄、 磨菇、 洋蔥飯，多謝承惠 37 蚊唔包嘢飲？！

第三、 四日，昭然諗到絕招抗奸商！

朝早喺企切一大盒生果 pack fruit 做早餐，返工路經傳統粥舖，買碟全走炸両加芝麻再加舊鬆糕當晏食，19 蚊飽大半日！

呢間公司嘅人都幾趣緻，坐房十幾個老細有一半帶住家飯食，但班伙計就出街豪？！昭然就唔想豪食垃圾嘞！

唉，返工路程咁遠、老細要求咁高、啲客又急又麻撚柒煩！

開個盤，睇昭然捱得幾耐唔俾人兜？


昭然

歸還！還有？

黃雨警告下還制服？！

今朝喺人力資源部遇到當日見昭然嗰個人事部高級經理，佢主動同昭然打招呼兼寒暄吓 (經典公司咁大，佢見咁多人都即時認得昭然仲叫埋名添，真犀利！); 嗰刻，昭然好想同佢講，叫佢俾昭然做我想做嗰個位，人工多萬幾有多嗰份呀！ (噚晚最新消息，又有兩個嗰個位嘅人遞咗辭職信！俾昭然做咪至啱囉，昭然條賤命專啃硬嘢㗎嗱！昭然破軍入命，打打殺殺昭然強吖次次贏未輸過㗎！)

但佢下一句就問昭然幾時返新工？為咗輸人唔輸陣，嗰句嘢即時吞返落肚啦！

Reception 姐姐問昭然捱咗幾耐？仲讚昭然捱得耐添！嗯，昭然好叻啊！

話雖如此，昭然始終覺得同呢間經典公司，緣未了！

噚晚，嗰個話幫昭然問經理嗰個高級主任，無情情 send 句咁嘅嘢嚟 : "有時間，食晚飯嗎？" 我答 : "人總要食飯，但點解要同你食？"

我答咗佢，但佢冇再答我嚕？！唉，話昭然過敏乜都好，喺佢未叫我爆房前一嘢打沉佢先，總之咪煩為根本！

昭然重申 : 無論我幾老，依然鍾意靚嘢、 型格嘢，而唔係普通核突嘢囉！

今晚要早瞓養神，聽朝要返一份觀音菩薩評價極高嘅工，緊張啊！！


昭然

別了 。 。 。經典！

經典公司，最後返工日 。 。 。

收工，即使昭然有 pass 同 password，都得識做問准 building guard 亞頭至敢上去守衛森嚴、鏡頭處處嘅禁地，同錫昭然嘅關帝爺爺 、地主公公婆婆、土地公公婆婆，裝香答謝兼道別！

(昭然所屬部門真係好秘密㗎！由於機密，唔方便影相，亦有好多地方唔影得！昭然部門，十幾萬防彈玻璃都有兩塊、監房防彈大鋼門有兩度、門未閂好第二度門係唔會開嘅、開每度門都要拍咭，每度門仲裝晒感應器，手指掂吓度門，電腦都有反應仲會顯示力度添！)

呢間喺鬼域上市、行內中全世界最大嘅經典公司 (連鬼域鬼佬朋友都識)，昭然只做咗兩個月零廿多日人，出奇地唔捨得？！？！？！

事關，的確考得好辛苦、審得好嚴至入到我個高度秘密嘅部門見識見識，真係大開眼界！

見工時，考卷數份、填表過百頁、兩語鬥嘴、考反應兼夾問我過去都算嘞，連童年都問埋嘅夠經典嗱啩？！查家宅、睇身家、 攞良民證就唔駛講一定要啦，仲要睇埋出世紙添！出世紙喎，昭然搵到俾佢睇而啲字仲未化嘅，唔犀利呀！

記得，靚仔大大佬聽完我答辯，佢讚昭然把口好得，點解唔做 sales？後嚟，知道佢曾經係經典公司嘅 top sales… 嘩，開心到我吖！top sales 喎，讚我把口好得喎，仲話我好重江湖女嘅味添！ (哈，江湖女？！)

梗係，嗰日見靚仔大大佬之前，已經俾人力資源部玩咗六個鐘有多 (唔計等嘅時間呀！) 至見到靚仔大大佬！嗰刻，我望住門口同自己講，唔容易至有嗰刻，我一定要你請我！

菩薩話，經典公司會挽留昭然，結果冇 (只有人力資源部，循例搵昭然傾咗半個鐘了解事件唧)！我 Division 大地震連靚仔大大佬都被調組，有鬼得閒留我咩！

噚晚，緣份安排，有一高級主任級人馬知我走，又知我當初見工見佢哋嗰瓣，佢好嬲問點解冇人留我射返俾佢哋組？又話醒目做得嘅唔留，留啲唔做得嘅死蠢喺度呃錢？分明忌才唔俾我上喎！ (當初我想做嗰個位，人工多而家一萬蚊有多㗎！)！同高級主任傾咗兩個鐘，佢話禮拜一會問佢經理挖我過組！高級主任仲話聽過我啲嘢，有人話我嘅閱歷同經驗唔只坐呢個低位，應該上高啲… 只係，有人夾生夾我喺個低位度踎、縺我價？！

命唔好、運唔順、冇貴人，冇嘢講！

留唔留唔緊要，昭然唔係扭肥股要佢哋睇，人工唔啱咪走囉，就係咁簡單！

四月一號，返新工、學新嘢！好嘢！！

兩個多月 。。。

兩個多月，經典工為昭然帶嚟嘅印記？！

兩個多月，冇時間見我醫師，噚日總算撐到去佢門口！佢為昭然已辭工而高興，唔捱夜冇咁難醫嘛！

兩個多月，全身肌肉為將達三年光景，回流返港嘅淒慘經歷而大僵硬，硬到瞓著都抽筋痛醒、痛到喊，硬到個人企唔直側埋坐？！

兩個多月，昭然冇親手抹屋企笪地！實在做唔到咁多，身心真係好攰、腰椎真係好痛！

兩個多月，煲湯煮飯夾硬做！我唔食，嫲要食！

上兩星期返通宵，仍然爭取時間寄喵、見工再見工; 見咗兩份普通嘢，兩份都 offer 請昭然 (話昭然老吖嗱、走得太耐吖嗱？！我一擊就打孖嚟呀，你有冇昭然咁叻先？) 嗯、嗯、嗯！！！

猶疑幾日又仔細考慮，終於決定揀邊份！觀音菩薩晨早幫昭然揀嘅，我仲諗咁多做乜？？？

諗多兩嘢就出事嘞，咪得罪咗菩薩囉！

最終，昭然部兩個幾月嘅 L 豬 - 豬貳跌爆 mon，順勢跌埋千四蚊。 。 。

昭然冇為一般人睇嚟不幸嘅半生人經歷而唔開心，昭然嘅感悟剛好相反，一切係昭然嘅福份！

蓮花弟子，誠心謙卑並隨時跪叩聽教，感恩！


昭然

三十六計…

噚日朝，觀音菩薩經解籤哥哥把口講咗呢幾番話…

"辭工？唔易呀！有排同妳傾留妳呀！"

"呢份唔易入呀，呢間公司唔係咁易請一個人㗎！唔，但有啲機喎！"

(其實佢請我㗎啦，等我答覆！)

"咁就即刻辭工啦！呢間公司唔輕易請人㗎，妳冇心中中吓俾妳入到咁咋！妳個位對客對外，唔駛一年有位妳上添呀！"

"不過，對下，妳一定要埋堆呀吓; 對上，要絕對服從、 合作、 妥協同溝通; 對同事，都要合作、 溝通，自己有幾多料唔好放盡。 唔准帶飯食，一~定~要~一~齊~出~去~食~…"

(吓，唔食都要去呀？)

"去，去飲杯嘢都好！" 😨

(咁，而家嗰份係咪加幾多都走呀？)

"走！時間咁長佢改唔到㗎嘛！" 👎

•

•

•

當日，解籤哥哥話光頭龜嗰班人排外利害，根本唔俾昭然融入去仲諸多挑剔想我走！而且，佢哋性格古怪唔識同外人相處，昭然乜都做唔到… (的確，事實真係咁！) 😲

而家呢份經典工，晨早講咗昭然唔鍾意做唔長！

(唉，考咗成個月，英文卷考咗三份、中文卷考咗一份、兩語唔少得、填咗過百頁嘅 forms，仲要查家宅睇身家、出世紙都出動埋！排除萬難咁辛苦至入到經典公司做，點知…) 😕

唯獨呢份新工評價最高？！仲講到一年唔駛上埋位添？！有啲驚囉！ 😬

唔理啦，做幾耐都跳咗出嚟先，咪四月七號後過咗 probation 就要一個月通知㗎啦！經典工做耐啲啲命都冇呀！話晒而家接住有工做，有收入個心定啲就得嘞！ 😁

經典工，返九個鐘、六日、輪班輪休、冇 lunch 冇 break 兼放勞工假; 新工，表面返八個鐘、五日、唔駛輪、有 lunch 有 break 放紅日。 兩者，表面人工一樣。 咁，仲駛諗咩？！老惡嫲都識揀啦！ 😏

解籤哥哥太了解昭然嘞，知我唔係埋堆死八婆、又知昭然太有個性同另類思想，所以賜昭然打工心法！解籤哥哥仲提醒昭然，話公司點做嘢係人哋嘅事，記住昭然自己係打工嘅唧！(唔，間嘢係有啲嘢嘅，I felt a bit！) 😒

Anyway，offer accepted 返去就辭經典工！嗯，蝦昭然老離港太耐壓我價走唔甩吖嗱，昭然就走俾你睇兼活得好好俾你班睇少過昭然嘅契弟睇！ 😈

Zombie 。。。

昭然攰到有啲啲虛脫嗱。 。 。！

返五晚通宵，被逼食咗餐春茗、 腦空空仆到去見咗兩份工！！

sent 三封喵有兩份肯見昭然，我覺得成績唔錯、 唔錯！

今日 (十七號) 呢份俾咗 offer 昭然，考慮ing 呢！因為見我嗰個女 Director 個相頭… 幾惡啃吓！

其實，昭然最想做上星期見嗰份囉！

唔諗啦，攰到冇力諗嘢呀，個人散嘅點諗？！聽朝收工直接去問觀音菩薩啦，哈！

今晚返工遲咗成個鐘 (臨走都整花個 record，真唔抵！)！昭然瞓到鬧鐘響都唔知，同事打嚟搵我至醒！噚日朝早收工搭巴士，又瞓過龍。 。 。

從來，昭然係個自覺嘅人，坐車唔瞓更唔需要依賴鬧鐘！返香港，見識過兩份俾人做嘅工，令昭然嘗試咗好多以前未試過嘅體驗！！！

之但係，昭然真係好攰囉 ) ) )

一個肥中女腰椎痛死體能壞，仲要搵錢、做家務、顧老嫲兼四圍撲？！俾昭然定吓心神執吓屋，回返個魂魄企起身做吓人，得嘛？

但，依然，感謝菩薩安排，喺昭然返夜期間俾我抽到時間見工，係唔夠休息似隻 zombie 啫！ \(╯-╰)/


昭然

哈！

昭然，發錢寒到…

變咗另一個人？！

一個，昭然唔認識嘅昭然？！

晏晝唔覺意買咗張六合彩，半夜收工一入屋鞋都未除，就即刻攞張頭獎飛出嚟對？！

搵嚟搵去搵唔到第 29 期嘅 result？

原來，未開呀！ 😂

好啦，笑過，又繼續打信寄喵啦！

日子，再苦，都要自娛啊！

塵世本是難、 苦難皆我命！

即使俾香港嘅刻薄雇主嫌昭然老，又話昭然離開香港太耐，乘機壓昭然價！唔打緊，佢哋總會歷三衰嘗色衰嘅一朝！他朝君體也相同，識解嘛？

人家睇少，昭然越加落力整靚昭然個招牌，昭然努力唔係要人家睇，昭然係為自己而努力啫！

事關，昭然想換間大啲嘅屋、 做返福記嘅貴賓; 昭然做自己有一定要求，學啲一般人淨係識睇少人、 踩人、 講是非、 誤解人咁得閒咩？做好自己再講啦，廢物！ 😝


昭然

日子磨人呀！

去中環，箍牙覆診; 徐醫生話箍耐啲穩陣啲，okay okay 反正昭然享受！

經過美國品牌護膚舖，以色列裔前軍人經理 Sara 搏命氹我夾埋枱！昭然又氹吓佢俾佢夾埋枱，結果… 梗係佢輸啦！我嘅藉口係，將我前日喺花園街駛嘅七舊水乘大七倍，話自己 spent too much, have no money to spend at all，嘻嘻嘻… ∩__∩y

同以色列靚女玩完，想食庶汁糕可惜未蒸好！

再經過 kebab 舖，真搶錢仲貴過鬼域？！貴過昭然鄉下都算嘞，仲要唔好食同企街食？！咁就六十五蚊，唉！

去麥奀買兩打生雲吞，再去三聯睇書。

嘩，打書釘嘅人仲多過食肆？！香港人認真好學有文化嘞，飯都唔食唔乘機擦鞋講是非，寧願睇書增智慧？此風值得推崇！

都係速離險境踏歸途，又經過獅子銀號。 醒起出糧，打簿振奮吓士氣先！

唓… WTF？！

息怒、息怒，搵工進行中… 不過，要電腦先生配合至得，噚晚佢作死打唔到信寄唔到喵呀？！

好啦，又要返工啦！又要對住令人眼花嘅數字同大堆薯仔文，仲有煩人嘅同事與客人呢！！

What the hell？！


昭然

又一單… …

喺昭然生命裏面，出現過嘅男人分唔到幾種種類，歸納嚟計而又最清晰嘅就只有一種！

就係，想同昭然上床！

識命理嘅昭然，自己知自己命！

桃花眼嘛？唔望雄性，避囉！

心口兩舊肉嘛？著樽領衫囉！

爽快惹人愛嘛？少講甚或唔講嘢囉！

衰樣招搖嘛？整烏 wear 自己囉！

男人，用得最多嘅低級手段喺昭然面前耍嘅，有兩種 :-

直接法 - 擺明車馬用言詞、 態度、 動作撩上床！！

利誘法 - 俾錢包養，有好處嘅交易！！

最難過嘅係，連識咗廿年嘅都係因為上床事件而冇朋友做！

昭然對公、 乸朋友都極之珍視，對住世嘅所有人、 事、 物都真心嘅; 縱使我真，公、 乸朋友依然自動喺昭然嘅生命旅途消失嗰喎？！此乃，命也！

通常，乸會癲一餐而滅跡！而公呢，唔駛講，係俾昭然拒絕後而匿跡嘅！

乸嘅唔講，癲嘅有乜好講？！

公嘅一定要講，因為冇品兼低智囉！

通常俾昭然直接拒絕嘅公，都會話昭然變態、 性冷感、 妳乜嘢年紀等等等等…

首先，縱使昭然冇性伴、 老公，都唔代表我好餓;

其次，唔餓並唔代表昭然性冷感;

再其次，即使昭然已達花殘色褪之齡，並唔代表你要上，我就即刻仆倒擘大髀搽定 ky 任你上;

再再其次，唔隨便就等如變態嘅話，變態嘅恐怕係閣下！

昭然嘛，對食有自我一套要求，專挑昭然鍾意嘅嘢嚟食，唔啱嘅唔食囉，昭然齋飲暖清水都得嘅！

公、 乸間，唔可以去動物園睇長頸鹿、 大笨象，坐低食杯雪糕傾吓計純樸地開始嘅咩？下下埋嚟已經鳩 gut gut，核突到冇嘢講囉！

今朝，收到個 message，大致係公朋友佢想忘記昭然，叫我 delete 個電話號碼 and throw away？！

寧缺、 勿濫，依然係昭然處事對人嘅宗旨！

既無公又無乸、 無是亦無非，樂得悠然清靜！


昭然

願… … …

為果腹、 要返工！

為返工，晏晝一點而未能去政總！

願，護黑擁匪嘅渣滓與被護擁者同遭天譴！行惡者必下地獄！！

共匪天下必亂之，懵懂港人請醒醒！


昭然

真的讚嗎？

噚日朝返工開壇搏殺前，昭然喺位同清潔亞姐 H 姐講早晨，佢突然同昭然講 : "我好鍾意妳嘅唧，唔知點解，我真係好鍾意妳…"

"吓？妳咁另類嘅？冇乜人識欣賞我嗰喎？！"

"人夾人緣啩？我覺得妳好好… 我炒幾次米粉，妳都唔賞面冇食… 下次，我另外炒盒俾妳嫲嫲食…"

"咁啱我箍牙要覆診嘛！妳炒俾兩個 Division 成六、七十人食，妳點拎返嚟呀？"

"擺喺架車度囉，我揸車返工好方便…"

see！昭然份經典工，員工都經典得過份！除咗清潔亞姐揸車返工咁富貴，佢哋同我一樣都要廿四小時當更㗎！

哈，呢份經典工，一般人入唔到嚟做，入得嚟就唔係一般等閒之輩！等昭然有時間，再寫低令我畢生難忘嘅見工經歷先！

雖然，昭然只喺經典公司做咗個零月，H 姐已經係第四個當住昭然面讚我嘅人嘞！

呢間經典公司部份人嘅眼晴，真係慧海咁充滿智慧嘞！ \^o^/

(讚昭然有四個，但背後耳語我嘅唔知有幾多個四個呢？！昭然唔係懵㗎，昭然乜都知㗎！因為，昭然唔係聽嘢用耳、 睇嘢用眼、 鬧人用口嘅 "人" 囉！)


昭然

又嚟？！

二月十八臨天光，昭然夢見…

自己喺條夜黑冇光嘅路行緊，被一戶人家嘅關帝爺爺吸引住！關帝爺爺大概七尺高，造型就係劉、 關、 張嗰種牌！

突然，我醒咗，聽到瞓喺床嘅嫲喃喃自語 : "咁衰，我又冇犯你，間唔中又嚟嚇我、 '嗡' '嗡'我…！"

昭然呢啲另類人即刻起身打開大門，掘住某個位講粗口鬧爆隻嘢，跟住對住同一位置唸咒、 唸經！

我諗，當時我個造型都極嚇鬼吓！起身時，髮尾、 髮頂都翹起嘅，仲要追住衝出大門碌大眼掘住佢大爆粗口 : "我 x 你老母呀！夠膽嚟蝦我亞嫲？我最錫就係我嫲，你唔撚知呀？仆你個臭街……" 跟住，依然碌大雙眼，唸咒、 唸經！

前年係咁、 大前晚係咁？！我唔出聲，當我哋嫲孫好好蝦？！鬧過嘞，呢三晚，冇再嚟！

感謝，七尺高嘅關帝爺爺賜昭然力量！

對住走廊講粗口時，我將聲音壓到最低唔嘈鄰居 (只喺喉嚨發聲)，但我感到字字嘅爆炸力唔嘢少; 開門嗰度力，亦唔係我平時會用嘅力，力加風幾咁有氣勢呀！

所以，點到佢唔驚？我亦感覺到佢驚囉！

蝦我冇咁嬲，搞我嫲，昭然唔同你班仆街死過，我唔撚叫昭然 (超自然) 呀！

都話唔好惹我㗎啦，昭然唔係普通人嚟㗎！ ╰_╯


昭然

過意唔去？！

有晚，食完飯同嫲傾吓計 (係呀，昭然同撞聾嫲好多計傾㗎！)，昭然又不時利用箍牙嘅牙箍整醜怪樣引嫲笑 (係呀，我除咗係嫲個出氣袋、 妹仔、 家廚、 營養師、 看護、 管家同米飯班主之外，仲係佢私家小丑嚟㗎！)。

忽然

嫲

收起笑聲

情深款款咁

望住昭然

然後

雙手摸住昭然塊面

"妳瘦咗好多呀，我真係過意唔去！"

"妳咁講，我仲過意唔去啦！我前世欠妳，而家還俾妳吖嘛！哈哈哈…"

嫲不停擰頭…

"唔係，唔好咁講！妳好好、 好孝順 (講呢句，昭然開始鼻酸眼濕！)，乜都唔駛我做，我又冇用幫唔到妳！"

"妳身體好、 食得咪懵戇鈍，唔好郁啲喳喳聲鬧我、 屈我，大家開開心心就夠嘞！妳條命咁苦，我唔對妳好咪仲賤！"

嫲條命，確實苦！佢嗰步係點，昭然略知一二！所以，昭然寧願放棄喺鬼域買屋、 買舖、 提早退休大計，都要返嚟陪佢老人家，並嘗試感動天地企圖改寫嫲嘅最後一章！

新工作、 脊椎痛、 理家務、 顧老人、 兩頭撲，點會唔攰、 唔瘦、 唔殘？！

嫲講 : "乜都係妳一個人做晒，手都粗埋！" (識講呢句就夠，以為妳睇唔到咋！)


昭然

五毫子

今朝收工返歸途中，有一六十幾歲嘅亞伯截住正在講電話嘅昭然…

佢一開聲就問昭然攞五毫子，然後攤開手掌俾我睇佢有個半爭五毫子搭車。 原本我攞緊銀包出嚟俾五毫子佢…

就係佢講咗搭車兩字，見昭然伸手入袋仲嘴多多話搭乜車都要兩蚊…

我手伸返出嚟，跟住同佢講 : "老人搭車要用長者八達通至有兩蚊優惠㗎！"

事情並唔係五毫子嘅價值，就算呃都只係五毫子嘅價值！

五毫子，可以賣掉亞伯你老人家嘅尊嚴？！請恕我，用呢五毫子買返我自己嘅智慧與理智！

你伸隻污黑嘅手掌出嚟問我攞五毫子，點解唔用呢隻手循正途搵五毫子返嚟呢？你呢代仲可以執紙皮、 罐仔，甚至問人攞五毫子; 到我老咗，相信頭兩樣嘢已俾大企業集團式做埋，而散銀更加絕跡於世！到時，我能夠生存嘅空隙肯定比你窄！

到底係菩薩化身考昭然善心，定係考昭然脫離執我未呢？

定係，考捱咗五晚通宵嘅昭然轉數有幾快呢？我攰啫，仲未懵！


昭然

31-12-2013

2013 最後一日，一定要記低嘅……

嫲孫晨早出門，等到第八架車至等啱車，上得！ @@

窮鬼睇早場 ^^ 未入場，嫲見到劉華海報就話橫掂出咗嚟，順便睇埋佢！好，奴才拿拿臨撲上去買飛！ @@

散場搵嘢食趕睇下場，喺 ifc 大半日都不停遊 lift 河同行垃圾後巷？！地方大，搵個員工問吓都冇？！冇人就問 Nepalis 啦！！ @@

終於，搵到嘢啱食！問賓賓男員工邊個門口入（門口都鬼秘過人，偏門生意係鬼鼠啲嘅？！），Nepalis 女員工落完單，讚嫲對眼 aggressive 添呀！（老虎打獵咩？咁 aggressive 做乜？） @@

食炸魚薯條、講英文，以為自己返咗鬼域添！ ^^

食完，起程睇劉華。呢個時候，奴才已經發現咗啲嘢，一直懷住害怕嘅心情睇劉華，直至散場……

散場，問准老佛爺旨意帶佢去洗手間；途中，lift 內有七個人，奴才個心跳到爆咁滯？！

殘廁門口呆等中，問嫲，要去廁所唔同昭然講？！佢唔好意思話忍唔住、唔覺意咋，小小冇幾多啫！

小？小？？一尿片都係，成隻熱辣辣糯米雞咁大隻！小？小？？ @@

（奴才忙碌清理中……）

（ifc 除咗遊 lift 河、行垃圾車後巷同冇個人問吓外，殘廁設備算係有齊架啦，至少有 soap 俾奴才洗手吖，好多地方連基本嘢都冇架？！因為坐輪椅嗰啲唔係人，要死撚晒佢架嘛，如果唔係，嫲孫就唔會去到邊成日都要行垃圾車後巷啦？！）

清潔乾淨，老佛爺面帶笑容話舒服晒；奴才洗手時見到自己熱到出咗一身汗、兩頰通紅，同嫲出街昭然真係唔可以著好啲啲嘅，著得比工人姐姐更 causal 就啱嘞！ @@

乾淨、舒服就好啦，去平台吸吓新鮮廢氣至返屋企啦！嫲頭顎顎四圍望好開心，奴才用僅有嘅地理常識講吓呢度邊度、嗰度邊度咁啦！期間，嫲用手遮住對眼扮知醜（瀨屎醜喎！）！冇佢咁好氣，繼續睇吓惡雀搵食、睇吓人飲酒，睇吓人哋個個著到靚靚，兩嫲孫就乞兒咁？！（噚日，有兩個有錢人嘅生物掘住我兩嫲孫架，奴才幾驚佢兩隻生物搵護衛趕兩嫲孫走呀！好彩佢哋慈悲咋，多謝、多謝！！）

回程啦，都好轉折架（ifc 真係好失敗，佢同海運一樣唔歡迎輪椅咁囉？！唔通啲金融人全部四肢健全唔會老嘅，精英果然精奇？！）！

要用升降台落樓梯，例必冇員工啦，奴才㩒鐘啦，個鐘好大聲架，全部路人望住奴才啦，好似奴才多手咁啦！！㩒咗兩次等咗好耐，忽然有個忍者員工閃出嚟啦，兩嫲孫仲要恭敬答謝啦？！ @@

上到巴士啦，奴才為保老佛爺坐駕安全，由總站企到總站全程個幾鐘，腰痛到呢？！仲俾老佛爺話奴才蠢有位唔坐？！係呀，我真係好蠢！我可以擺妳喺老人院乜都唔理，搵幾多駛幾多揸靚車、著靚衫，駛鬼返嚟香港捱咩？！同妳出街著好啲都唔方便，著得輕便啲又俾人眼掘掘？！係囉，我蠢囉！！

倒數完，嫲問聽朝有乜節目？我話飲茶，佢話要食鬆糕（取其鬆鬆動動之意喎，正一鬼靈精！）！我話佢好叻，瀨屎瀨到年尾，聽朝唔係食糯米雞咩？哈哈哈哈哈哈哈哈…


昭然