硬受！

噚晚，昭然邊拉筋邊嚎哭 。 。 。

喊到滿面眼淚鼻涕起粉癮咁，仲扯埋蝦！好難過、好淒涼、好無助！！！

因為盤骨底 (坐骨神經位置) 痛返個幾月，只有愈嚟愈痛仲牽扯到尾龍骨、頸膊？！

人老、 退化，我明！

但昭然先天不足，加上自少做粗重家務，跟住後母嗰幾年又營養不足仲要擔驚受怕俾佢虐待！又加上喺鬼域捱壞兼受氣，冇得食又唔夠休息！回流返嚟幾年，又頻撲又勞心力唞唔夠！夾夾埋埋，昭然退得更快！

呢個幾月，我深感距離做手術用 stick 癱喺床做廢人嘅日子，好近！

唔係怕痛怕獻世怕長期食糖嫌醜樣唔靚，係怕昭然有事，冇人撐起兩頭家同照顧家中瑣碎兼老嫲啫！

邊喊邊嗌滿天神佛名號，連土地、地主、外姓街仙乜都嗌，總之識嘅就嗌，嗌佢哋幫手撐住昭然棚賤骨頭！就好似，細路仔喊住嗌亞媽咁！

表面好人好者嘅歲月剩返唔多，昭然要同時間鬥快，喺我出事前要盡快儲夠錢，搞掂埋呢間爛屋至有命！

投胎嚟呢個屋企冇嘢好，最大獲益係學曉如何，逆~來~硬~受 • 絕~處~求~生！！


昭然