想，妳！！

原來以下嘅事，發生喺我剛返香港嘅個零月後！

呢排，因為某啲事，我總會途經呢間麵包舖兩、 三次; 每次都會望吓同一個巴士站、 同一間麵包舖，一樣嘅街道，唔一樣嘅心情！

當時 91 歲幾嘅亞嫲，篤住把遮慢慢行，都仲可以自己出街！

記得，有次佢鬧完我，知衰，佢仲落街買魚柳包同皮蛋酥俾我食，試圖氹返我！

嫲出事嗰日都仲開開心心、 好胃口、 手腳靈活、 精精靈靈㗎！

即使彌留期間都仲識答我嘢，仲好靚女㗎！

佛菩薩，點解要咁？

我返咗嚟，頭搭尾短短五年時間就攞走我最心愛嘅人？！

而呢短短五年時間，仲要我千百樣嘢同時發生要我處理，嘥兩嫲孫相聚嘅時候吖？！

實在，太殘忍啦 ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) ) )

佛菩薩，用得著咁殘忍嘛？！

嫲，我真係好掛住妳呀！！！

嫲，我喊，妳唔好喊，妳要開開心心、 堅定精進修行，知道嘛？！ (我做唔到嘅，妳要全部做到，妳好，係我唯一嘅心願)

呢個星期日，又係八個鐘 nonstop 唸經嘅大日子，想妳！ xoxoxo

昭然

** *** **  ** *** ** *** ** *** **  ** *** ** *** **

2011 • 7 • 21 (星期四)

今朝同亞嫲去抽血、 飲茶，跟住分道揚鑣我返工、 佢爛街．．．

野性貓嘅亞嫲，要佢而家三步不出歸門確係難為佢！佢今日就好似放監咁行咗五個幾鐘！

當亞嫲行經一間貴到飛起嘅麵包舖門口，停一停、 唞一唞、 昅一昅，有個中年女人問亞嫲係唔係想食麵包？亞嫲話唔係，佢想睇吓啫。 就係咁，個女人買咗一磅枕頭包、  兩個亞嫲話好好食嘅包（我諗要三、 四十蚊，亞嫲唔捨得食晒，留番一半俾我喎 @@）！

我同亞嫲講，叫佢多啲出街企喺人哋門口乞多啲嘢返嚟食，咁我咪唔駛做囉！ ^o^

亞嫲都算著得企理、 乾淨，又唔似老乞兒吖？我日日放工都見到兩個道友坐住輪椅叫人買飯俾佢哋食，相反亞嫲乜都冇做就得米，真係家有一老如有一寶呀吓！

而家百物滕貴邊有人咁好心㗎？

多謝嗰位好心女士，我兩嫲孫祝妳身體健康、 生活愉快！

希望財神爺下次係俾錢我兩嫲孫駛，而唔係包啦！  ^o^

到咗！！

族今朝 0514，發夢，發醒咗！

發到一個，自昭然六歲幾，佢過身後，幾廿年我未感覺過佢，但曾經一齊住過嘅 ‘人’！

我亞太，亞嫲嘅亞家 (順德話，即亞媽)！

自我認識亞太，佢已經中咗風、 左半邊身癱咗、 行動不便、 經常整污糟間屋、 大脾氣、 經常離家出走，亞太咁多個死女，就只有我亞嫲肯出錢出力照顧佢！

即係，當時我亞嫲要搵食 + 照顧個癱 + 照顧我！！！

據聞亞太好爛賭，打日本仔時，將亞嫲同吉先生幾籠靚衫賣晒嚟養班死女，同埋。 。 。 賭！！！

•
•
•

細個，十歲前，亞嫲都有帶我上芙蓉山拜亞太同太公，除此，就冇再上過去！ (呢次我回流返嚟，有問過亞嫲上唔上芙蓉山拜佢老豆老母，點知，亞嫲話咁多年都投咗胎，所以係冇去過！其實，亞嫲係嬲佢亞家唔錫佢，只係識搵亞嫲笨！)

我見超度開，即使幾經艱辛，都問人攞亞太同太公嘅牌位地埗！

講嘅唔清晰，我又打電話上山問，務求攞到正確資料同佢兩位報名參加超度法會！

•
•
•

噚日，係第一壇趕得切同佢兩位報名參加嘅法會，但因報名時未攞到往生日期資料，未有燒蓮花、 金紙！

頭先個夢，就係亞太話我知，佢到咗！

我師尊有幾靈，我梗知，絕對唔駛懷疑！

see，報個名咋，都即到呀，好過人哋駛幾多幾多錢打齋啦！

驚訝嘅係，亞太，幾廿年冇見過妳，妳仲未走呀？！

•
•
•

我呢個亞太，曾經同佢啲孫講過，佢咁多個孫，最鍾意邊個，因為亞邊個最靚女，而咁多個息 (塞) 當中，最錫係昭然，因為我最乖、 最有性！

同佢生活過嘅日子，我偷瑞士糖食，會分半賊贓俾佢食！

有小販上樓叫賣，佢會俾錢我買，買嚟一齊食！

佢癱嘅唔知大力，細個時，食佢唔少大力掌呢！ (我喊咁口同亞嫲講亞太打我，亞嫲話佢叫我唔係打我，哈，咁就唔知啦！)

點都好啦，到咗就好，經我手報咗名嘅 ‘人’，要珍惜機遇呀！

雖然妳只係俾個側面我見亦唔係親口同我講嘢，但憑其他人講嘅，我知係妳！咁避忌都嚟講聲我知，到咗，真有交帶！哈哈哈哈哈哈哈哈哈哈…

昭然

再戰 • 日常

對面枱，兩嫲孫坐過兩、 三次！

左手枱，晚飯時坐過，記得嗰晚亞嫲食咗好多魚呢！

右手枱，都打過躉！

呢間酒樓，每個角落都充滿回憶呢！

嫲，原本安排今日上山睇妳，點知我懵，臨時有改動嚟唔到！要下星期，至可以山上見面啦！

請恕我，不孝！

* * *

知客姐姐驚我怕嘈，有俾我揀另一張路邊幽靜枱，而我，偏偏揀呢張最旺嘅！

為嘅，就係考驗自己，愈獻世、 愈痛、 愈肯面對，痊癒愈快！

* * *

開茶姐姐話我以後得返一個人，知客姐姐話佢咁講嘢！
(佢講事實啫，相反，我鍾意呢啲人，夠真！)

開茶姐姐話，咁多客，佢一定記得我！

因為我真係對嫲好好，唔似其他人三分鐘熱度做唔足、 做表面嘢; 話我又捨得俾嫲食，龍蝦呀、 魚呀，唔靚唔嗌，邊有人咁捨得！

話嫲臨尾幾年有我咁待佢，話嫲好好福氣！ (真嘅？)

* * *

嫲，感激妳俾機會我侍奉妳，可以嘅，我願意重頭再嚟！

不過，係喺個天度，凡間，我都唔願多留半秒！

所以，妳咪返嚟留喺我身邊呀，我烹妳扯㗎！！

* * *

是日考驗，失敗！！！！

我，有鼻酸 + 流淚呢！！

嫲，想妳！依然，愛妳！

昭然

自我 • 擇日 • 重生

原來，啱啱過咗嘅五月，係昭然回流返香港嘅第六年！

六年，發生咗好多嘢！

返奴隸工、 撞車、 無限嘅家務、 撲買餸買尿片、 經年嘅裝修、 我病、 煮飯煲湯、 返奴隸工、 陪玩陪食、 我病、 返奴隸工、 ot、 嫲病、 醫院覆診、 返奴隸工、 撲老人院、 陪玩陪食、 趕覆診、 返學讀書默書測試考試、 無限次仆昭街醫手腳、 推嫲撲睇醫生調理身體、 返學返工老人院、 飲茶食飯推嫲上山落海周圍食同玩、 嫲病、 我一個人醫院當屋企個多月、 嫲死、 一個人撲喪事、 一個人療傷、 一個人適應。 。 。

感恩佛菩薩、 師尊，上星期日俾兩嫲孫相聚，嗰刻，我真正安心！ (師尊 + 瑤池金母護住嫲嚟喎，唔係護法同空行喎！)

亦喺嗰刻，我決定聽日唸嘅八個鐘 nonstop 經，擺嫲喺壇外，而我，就換制服入壇！

* * *

寺內制服賣晒，要自己喺街買棗紅色衫褲！難！！

上星期日唸完經，喺街撲咗兩個鐘，都只係買到唯一得返一條嘅棗紅色褲，衫 + 襪，係噚晚收工趕收檔前買到嘅！

* * *

佛珠，我一直大概知道擺喺邊，但呢幾年發生太多事冇心神冇記性，唔記得擺喺邊！搵咗兩次搵唔到，頭先入寶貝嫲間房摸吓，突然間摸到袋喺英國帶返嚟嘅經書同兩串佛珠！

買棗紅色衫褲，我係唸住咒求師尊俾我買到嘅，佛珠，亦都係求師尊俾我搵返嘅！

入壇，一定要用佛珠，非常時期，真係唔想花錢請另一條佛珠，亦花唔起呢啲錢 (幾千蚊一條，好貴)！所以，今晚一定要搵呢串佛珠出嚟！

呢串英國師兄 (夢到我前世嗰個) 送俾我嘅，珠冇披星斑點、 又有裂紋，好寒酸呢！

不過，喺英國時，係呢串佛珠陪我一日兩修 + 持咒嘅修行伙伴！！

* * *

聽日開始，一連八日唸經迴向師尊，慶賀佢老人家下星期生日！

我揀聽日入壇，好比，我亦重生！

自我擇日重生，意義極之微妙呢！

嫲孫倆皈依師尊已十六年，師尊幫過我哋嘅，點會忘恩？！

喺英國發過願，我話過，只要俾我返嚟陪亞嫲行佢人生最後嘅路 + 改寫亞嫲人生最後嗰章至完美; 將來，只要用得著我嘅，我一定盡力做，弟子我，點會食言呢？！

感恩師尊慈悲成全俾機會，聽朝，full gear 壇內見！

昭然

嚟，食糭！

我寶貝，昭然嫲，是日十二點過啲就開始食糭嘞！

昭然嫲，好鍾意睇爬龍舟，唔知，佢而家有冇得睇嘅呢？

冇得睇唔緊要，都有糭食 + 我陣間唸經，乜數都補返啦！

話晒，我曾經係靚女，靚女搞到咁嚟為妳，咁都仲唔心足？

呢兩個幾月曬怕咗，以後上山見到包住自己嘅怪獸，唔駛驚，係我嚟嘅！

tell you guys，我正喺度吹緊 underarm，爽呀！！！  Λ冊Λ::y

獨自，飲茶中。 。 。

呢刻，流住悲傷嘅眼淚，為自己嘅勇敢，打氣！！

嫲，口渴喇，嚟，飲啖茶，唞唞氣至返入泥吽過！

寶貝 • 嫲

兩年前嘅今日，昭然嫲，精精神神喺酒樓食好多魚肉！！

出事嗰日 20161226，昭然嫲，一樣精神，喺酒店食好多魚肉！

•
•
•

人類，真係，既無能又脆弱，極之可憐！！

本嚟就咁化學嘅人生，當遇上死亡咁接近嘅關頭，兩嫲孫竟然。 。 。 傻傻吓。 。 。 唔知？！

從 20161230 入院，至 20170119 朝早十點半前，兩嫲孫，從來，冇諗過返唔到屋企！

呢場仗，兩嫲孫並肩作戰，堅持到 20170201 黃昏！！

•
•
•

人類，營營役役、 捱生捱死，其實就喺度等死！！

好玩之處，係唔知點死？！同埋，唔知幾時死？！

正因為，無常二字真係好無常！

昭然，奉勸各位，珍惜 + 爭取同長輩相處嘅分秒，要多傾講、 細心侍候佢哋！

唔好將個人享樂擴大，亦唔好將自己嘅伴侶、 兒女，睇到大於整個宇宙！最需要我哋嘅，其實係家中長輩！！

我咁樣對昭然嫲，有好多嘢，昭然都覺得自己做得唔夠妥貼！！！

冀望閣下，喺離開呢個荒謬塵俗之時，唔會帶住歉疚之心入殮！！

昭然