折腰﹗

昭然失蹤期間，的確發生咗好多事喺苦命嫲孫身上．．．

繼昭然身子被懷疑腸癌係咁大量甩頭髮不停飲藥調理，呢邊藥未放得低屋仔又發難﹗喺鬼域返嚟冇耐，一月內棚都搭過兩次，激心激肺嚟攞命﹖﹗

十月中，L5 腰椎舊患極急百級痛，痛到行、坐、企、瞓乜都唔得﹖﹗嗰個禮拜六撲去照 x-ray 兼針灸、推拿、照燈、敷藥又飲藥﹗針咗四、五次都仲係麻痺，由腳痺到上後尾枕，見事態愈催嚴重，即刻搵返昭然個專上門幫人穴位按摩嘅醫師老朋友入我家門執返劑；按一次就冇痺，昭然真係要佢幫至企得起身做得人成﹗

腰椎痛入心肺之時，嫲驚肥孫死得唔夠痛快，老人家靜待時機整多昭然一腳．．．

老佛爺痛風發作唔行得又唔肯着尿片，即使奴隸孫條腰百級痛都要不停手日抹幾次地，同徒手洗瀨屎尿褲、洗被、曬床單﹗扶嫲坐上圓櫈肥孫拉肥狗咁拉嫲入浴室洗皮股，洗完又拉番隻肥狗出廳﹗煮兩餐要換好幾個姿勢至煮掂俾開胃嫲食，仲要買餸呢﹗嚇到醫師仔碌大眼擘大口，仲讚我叻咁痛都捱得過﹗佢叫昭然乜都唔好做齋瞓架咋，奈何﹗嗰個禮拜，昭然撲到連自己嘅藥都忘記飲呀﹗

呢邊未掂檔，腰痛住又忙搵人幫屋仔強制驗窗﹗頭一個有牌驗窗人話昭然啲窗較全部唔合格要換晒佢，黐撚線﹗昭然即刻打俾裝修佬講數，要換都係佢俾錢，窗廠又話上嚟驗但又放飛機﹖﹗擾攘一輪，搵咗樓下鄰居個同鄉上嚟驗；開口千五實俾千二，齋驗窗交張表，呢個係癲價﹗算，真係搞掂嘅多幾舊當送瘟神﹗

腰椎最痛時，昭然踎喺醫師仔房喊，一切痛嘅回憶返晒嚟﹗ 十幾年前，喺養和住咗個幾月話要做手術﹗廿四小時帶腰封叭喺度瞓床，去小便去足半個鐘，因為條褲跌咗落地彎唔到腰執﹗擦牙含住啖水吐唔到，因為條頸耷唔低﹗過馬路等紅綠燈，痛到等唔切要踎低等﹗坐骨神經痛，老朋友醫師推到昭然流住眼淚死忍，真係好痛好痛好痛﹗

直至噚晚，一如既往用心煮飯俾嫲食，都要燙到整個大水 pop 過我嘆﹖﹗今日抹地時整穿咗嚕，要搽乜至冇疤呢﹖要睇醫生嘛﹖

菩薩、睇相佬、解籤哥哥、路人，人人都話昭然孝順﹗原來，孝順，只令濃丁昭然窮忙﹗ 如果，昭然可以好似其他人咁，乜都唔駛理擺低啲啲所謂家用就得，我可以著得靚靚、油吓指甲、揸靚車約朋友食吓飯，可以過得絕對舒適﹗唔駛返嚟兩年忙呢忙嚕，引致舊患急劇惡化兼做到手都鞋埋（第日有拖拍都唔好意思伸對手出嚟呀，連嫲都話鞋呢﹗）﹗

兩個醫師話昭然今次會癱，仲會即時癱到唔郁得，好彩個人喺香港可以即時救得返喎﹗

哈哈哈哈哈哈哈哈哈哈哈哈哈哈哈哈哈哈哈哈哈．．．．．．．．．真係感激不盡唔知點報答好喎﹖﹗

感謝，蒼天安排昭然返嚟醫病，原來喺鬼域捱到咁傷﹖﹗大陸老中醫亦講過，昭然已病入骨好嚴重，亦非一朝一夕嘅事; 如果唔理，將來會好麻煩﹗所以，佢老人家好少出山幫病人點穴都忍唔住救救小命﹗其實，都係託帶路者嘅面子地位，病壞昭然至捻來此等福氣﹗

感謝，老中醫幫昭然點穴兩次散風﹗

感謝，醫師仔開獨門秘方俾昭然敷治﹗

感謝，老朋友嘅三隻手指按到昭然瘀血都出埋一嘢到位﹗

感謝，素未謀面嘅 blog 友們分別寄腰封、介紹脊醫，仲不停慰問昭然呢﹗

感謝，做兼職工時識嘅大肚婆舊同事日日忙裏問好﹗

感謝，昭然睇開嘅名脊醫無了期放假唔知幾時返，幫我慳好多錢﹗

感謝，無端端俾昭然瘦到骨都出埋，呢幾日又好食得，真係好好玩﹖﹗

感謝，菩薩一切嘅安排﹗安排得密質質好鬼死精彩嘅唧，氣都唔俾昭然唞，駛唔駛咁樣招呼我先﹖﹗

屋仔，你再係咁多鳩事，落難業主會即刻即刻即刻即刻賣柒咗你﹗火撚滾呀﹗


昭然


後話 ：

九月，昭然去見過一份銀行工。申請咗個幾月，搵我時都冇回事﹗

得兩日準備，臨瞓上佢網頁睇，點知．．．銀行已被染紅﹗

當堂冇晒心機，hea 住見都俾佢兩個問咗差唔多四十分鐘，熱到標晒汗﹖﹗

昭然唔喜紅只愛藍，請都唔會做絕不折腰﹗

（其實，人哋都唔會請未做過銀行工嘅昭然；昭然只係見佢有幾間分行喺我家附近夠晒近，咪試吓囉﹗咁都有得見係咪好出奇呢﹖）

好耐都冇著黑褸、黑裙、黑絲襪、踩高踭、黑皮手袋、淡掃脂粉喺中環行喇，當日有兩個西裝友擰轉頭望昭然﹗（因為，佢兩個都算幾型幾靚仔，可惜又係幼齒嫩過昭然（唉，紅顏真寂寞啊﹗），昭然擰轉頭望佢哋咪知道人哋都擰轉頭囉﹗哈哈哈哈哈哈．．．）﹗

唔，病甩毛唔在狀態都有人擰轉頭望，算係咁啦﹗算係對得住自己個殼，亦冇丟老祖宗嘅架啦﹗

證明，人靠衣裝係永恆吸引被揀嘅條件﹗尤其喺亞洲區﹗﹗膚淺﹗﹗﹗


．

．

．


哈哈哈哈哈哈哈哈哈哈哈哈哈哈哈哈哈哈哈哈哈．．．．．．．．．

打 blog 期間，嫲間屋仔嘅大門又有管理員拍門，梗唔係好嘢啦﹗

同 a 屋當初同一問題 – 滲水﹖﹗

又擾攘一輪，樓下屋主上嚟昭然又落去睇，佢不停叫我拆拆拆整好佢；我同主任仔講叫佢聯絡食環署做色水測試先，咁多年嚟已經全部地磚牆瓦拆過兩次嚟大整，當時叫量地師男友（欠昭然錢嗰個踎監人）出投訴信推咗第三次唔整﹗究竟邊度漏至知整邊度吖，冇線索盲中中整乜呀﹖﹗

叫食環署做色水測試係兩年幾前保險公司教昭然嘅，經過 a 屋呢兩年密集訓練，昭然學識好多嘢已成半個內行知啲程序，呢幾十萬駛得抵吖、好值呀﹗

主任仔、樓下屋主幾愕然架﹗佢哋誓估唔到，面前著睡褲、亞婆衫貌似懵婆幾好蝦嘅昭然，居然氣定神閒仲識得吩咐主任仔搵食環署；主任仔爛中立唔出聲，想昭然乜都自動波整咗就算當交差﹖﹗你精我唔笨，叫你做啲嘢參與吓有證有據至嚟傾過啦﹗

果然，歷練令人急速變質﹗昭然，變得臭寸咗﹗﹗

嗯、嗯、嗯﹗﹗﹗昭然大個女識多咗嘢架啦，唔係十幾廿年前嘅細蚊女啦﹗

又其實，昭然有預感又有嘢搵上門架啦（感覺到，係時候有人嚟拍門咁﹗），仲知道開邊瓣添﹗只係，估唔到咁快仲估到中一中啫﹖﹗


．

．

．


發生喺昭然身上嘅，全部真嘢、堅嘢冇吹水唔抹嘴，精彩嘛﹖﹗﹖﹗

哈哈哈哈哈哈哈哈哈哈哈哈哈哈哈哈哈哈哈哈哈．．．．．．．．．

真心笑架，因為真係好撚好笑，即使唔笑亦都喊唔出﹗

哈哈哈哈哈哈哈哈哈哈哈哈哈哈哈哈哈哈哈哈哈．．．．．．．．．


．

．

．


b 屋租出定賣出，始終都係投資之一，要靜心諗清楚至得﹗

奈何，回流返港兩年幾都未定過，下下嚟得咁急攞命咁想昭然死﹗

唉，停停得嘛﹖昭然，總算能稱為人一個吖，何故對卿若此﹖﹗

七月份嘅鬼域行，其實好好玩遇到好多奇人奇事嘢，全部都想記低，但係事事煩心確實冇心情﹗

返鬼域四個幾禮拜，揸車車行咗千幾 miles 四圍遊玩散心，天被地蓆玩到邊瞓到邊，逍遙之極點會唔開心﹗

四個幾禮拜，昭然病足半個月瘦咗十幾磅似隻鬼返嚟﹗期間，只沖涼三次油頭垢面，肥雞亦醃得頗啱味; 所以，流浪野人冇乜自拍照，哈哈哈哈哈哈哈哈﹗

昭然此行除咗執包袱六大袋共 125kg，亦去咗首都同著名大學埠睇屋睇舖心郁郁呢﹗只要人在鬼域有屋有舖收租，昭然仲駛鬼做咩，最多做幾日兼職打發時間﹗

諗起香港嗰張笑騎騎見工相就作嘔，臨老獻世﹗昭然目標向來清晰，就係五十歲放慢腳步退休，而家．．．折墮呀﹗

返到香港，又見美國屋平過一排，鄰居都買咗兩間收租，點會唔心郁郁﹖唔，美國屋多數係木屋風吹就冇，昭然唔鍾意﹗

陳生好介紹，叫昭然喺紅日國首都買間別野都係四十個，好抵玩﹖﹗昭然還佢價，少個零就即刻手過手真銀交易，哈﹗嘩，地震乜都冇得殼眼淚，別惹我﹗

唉，講乜都冇用﹗人唔郁得，被迫綁死喺臭港 – 等死ing﹗